India ramah Thawhlehni khan coronavirus kai mi 7,579 hmuh chhuah leh a ni a, hei hi ni 543 zet hnua ni khata an tlem leh \um ber a ni a, tun hnaiah sakhaw kûtpui lian tak an hman hnuah kai an pun loh avangin hripui hian a kiansan khata ngaih a ni.
“Hindu sakhaw kûtpui, Diwali-ah pawh hri kai pung kan hmu ta lo,” tiin National Institute of Epidemiology director hlui, Dr M D Gupte chuan a sawi a, hei hi Indian tam zawk taksaah hri ngaia neihna a awm tak vanga ngaih a ni.
“Tunah chuan kan him tain ka hria,” tiin Gupte chuan a sawi.
Hri leng thawh hnihna na tak, April leh May a liam hnua sorkarin zirchianna a neihah July thla khan Indian 70% dawn chuan hri hi an kai tawh a. A kai leh turin an taksain ngaiah a neih tawha ngaih a ni.
Health ministry-in thuchhuah a siamah chuan hri kai enkawl lai hi a kai hmuh tawh a\anga chhutin 1% pawh an tling tawh lo va, hei hi March, 2020 hnua a hniam lai ber a ni.
India-ah hian kutpui hman niin boruak bawlhhlawh tak leh thlasikin a tuam \an zui mek a. Hengte hi coronavirus inkai darh awlsamna tak tur a ni hlawm a, hri leng thawh dang pawh a lan mai rin a ni nghe nghe.
Chawlhkar 21 zet liam ta chhung khan ni khatah hri kai hmuhin mi 50,000 a tling lo tawh a. October thla tir a\ang phei kha chuan mi 20,000 an tling lo tawh bawk a, April leh May thla vela ni khata mi 400,000 chuang kai hmuh a\ang chuan hniam tak a ni tawh.
Sorkar leh hriselna lama mi thiamte chuan thawh thumna a thlen an ring a, August leh September vel khan chanchinbuah pawh October leh November velah a vanglai dawn niin an sawi.
Ministry of Home Affairs hnuaia National Institute of Disaster Management (NIDM) pawhin October-ah thawh thumna a thleng dawn niin an sawi a. August thla laihawlah khan Prime Minister’s Office-ah pawh hei hi thehluh niin sorkar leh mi thiamte pawh inring tura tih an ni.
NIDM-in report an siamnaah pawh tel, sorkara principal scientific adviser K Vijay Raghavan chuan May, 2021-a thuthar lakhawmtute a kawmnaah COVID-19 thawh thumna a awm theih thu leh naupangten an tawrh zual a rinawm thu a sawi lawk.
India rama zirna in \ha, Indian Institute of Technology – Kanpur pawhin inkhuahkhirhna siam a nih loh chuan October thlaah hian ni khata hri kai mi 3,00,000 vel an awm dawn thu leh thawh hnihna ai chuan a nasat dawn thu an sawi bawk.
Inkhuahkhirhna a \hat erawh chuan ni khatah mi 2,00,000 velin an kai thei dawn niin an sawi bawk.
Thlirlawknaah India dinhmun chhe mah se hetiang hi a thleng zui lo va. Tunah chuan mi thiamte pawhin Covid-19 hi India bikah chuan ram bung khat, huam zim zawka hri leng angin an ngai tawh a ni.