EDITORIAL 25/11/21


A hriate rawn hmasa chunga hmun pawimawha hmalak

Tun hnai khan National Green Tribunal, Eastern Bench chuan Chalfilh tlanga tourism department-in construction an lo tih tawh zawng zawngte thla khat chhunga tichhe vek tur leh thian fai vek turin Mizoram sorkar thu a pe a, NGT thu hi Chalfilh tlang lo enkawl nasatu Khanpui khua chuan pawm lovin, tihchhiat a nih loh nan hma an la ve thung.
Khanpui khawtlang sawi danin, “He building sakna hmun hi phul hmun vek a ni a, thing leh mau tihchhiat a awm lo,” an ti a, he building thiah hian tui hna a tihpun belh a, ngaw a siam belh dawn loh avangin Khanpui khawtlang chuan thiah kher a tulna an hre lo tih thuchhuah siamin an tar lang ve thung.
Kan hriat angin kan ram chhungah ngei pawh hmun pawimawh tak tak kan nei ve ta nual a, thenkhat phei chu khawvel hriat tham dawn dawnte pawh a ni ve a ni. Humhalh ngai zual tak tak pawh a awm ngei mai, mahse a enkawltute lam nena inpawh taka inrawn tlanna hi awm hmasa thin se tih hi duhthusam chu a ni.
NGT lam pawh hian thing leh mau humhalh leh tuihna siamtu a awm zel theih nana hnathawh awmsate pawh thiah a nih an duh a ni ber a, he lai enkawltu leh hman atanga ruahmanna engkim lo siam a, lo cheimawi tawhtute erawhin chutiang a awm loh thu an sawi ve ta thung bawk nen, inpawh taka titiho leh sawihona a awm hmasa lo niin a lang a, hetiang thil hi thleng nawn fo tawh lo se a tha hle.
Hmun dang zelah pawh harsatna kan tawh zel loh nan Chalfilh tlang enkawltu Khanpui khawtlang duh dan ang deuh zel hian department, society leh NGO leh a dangten sum siam nana hmanga hma la tawh lo law law tura an duhna hi hriatpui hmasa zel tawh ila a tha awm e.

Leave a Reply

Your email address will not be published. Required fields are marked *

error: Content is protected !!