French champion Lille in tualchhung inelna lamah chetsual nei leh thin mahse UEFA Champions League-ah erawh an dinhmun an siamtha a. 1-0 a RB Salzburg hnehin Group G-ah hma an hruai.
Stade Pierre-Mauroy-ah Lille tana goal khungtu hi striker Jonathan David bawk a ni a. Canadian striker hian tlarhma lama a dinpui Burak Yilmaz thawhrah sengin minute 31-naah goal a khung.
French champion hi Ligue 1 lamah match nga atang chak hmel hmu tawh lo an ni a. Europe huap inelnaah erawh point 8 an hmu mek a. An group-ah engkim chiang turin matchday hnuhnung ber an nghah ngai mahse a sang berah an awm rih.
Kum 21 mi David hi tun season-ah goal 12 a khungna a ni a, league lamah goal 10 khung tawhin UCL bikah an match hmasa zawkah Sevilla an hnehna turin goal a khung tawh bawk.
Gent atanga nikum nipui a Lille in Victor Osimhen hmunruak luah tura an lakluh David hian ngaihven a hlawh mek zel a. “Goal khung a nuam a, tuna ka chetthat a kaltluan avangin ka hlim hle. Mahse a pawimawh ber chu inkhel a hnehna chan hi a ni a. Ka goal khungte leh khelmual chhunga ka chetdanin ka team a puih chuan ka lawm a, mahse a pawimawh ber chu chak a ni. Ka chetthatlai a ni a, mahse team thawhhona a ni a, ka teammate te vanga goal khung ka ni.” a ti.
Inkhel lehlamah Sevilla in an mikhual Wolfsburg 2-0 in an hneh ve a. An result avangin an group a la inhawn phah.
Estadio Ramon Sanchez Pizjuan-ah Sevilla tan Joan Jordan chuan inkhel tan tir lamah goal a khung a, huntawp dawnah Sevilla substitute Rafa Mir chuan an hnehna tichiang turin goal a khung belh.
Wolfsburg in coach thar Florian Kohfeldt hnuaia an tlawm hmasak ber an tawng a, mikhual team hian goal hlauhawm an siam mang lo.