Tun kartawpa a IBA intercontinental title kawllai humhim tura hruihrual chhunga lut tur NT Lalbiakkima chuan a khingpui tur Gerrtipong Kumsahwat hmachhawn a a inpeih tawh a. A champion title humhim turin a inringtawk tih a sawi.
LPS Fight Night 2 hi November 27 zan dar 8-ah Dawrpui Multipurpose Hall ah neih a ni dawn a. Professional boxing inelnaah hian Mizo professional boxer pasarih an inlan dawn.
Nilaini khan Mizo boxer-te hi phochhuah an ni a. Main event a inlan tur Biakkima chuan a inbuatsaihna a tha tawk a. Chak turin inrintawkna lian tak nei mahse a khingpui a zuam sual dawn lo tiin a sawi a. Round 10 khelh tur chu khelh zawh ngai lova chak theih ngei a inrin thu a sawi.
Biakkima fimkhur chhan hi a khingpui in professional huangah tawnhriat a ngah zawk vang a ni a. Tuna an inhnekna tur rihna huang ni lovah nikum khan Flyweight-ah WBO Asia Pacific Championship title chuh a ni a. Rihna huang chung lamah a inlan fo tawh thin avangin Mizo boxer a fimkhur.
A enna tur ngaihven hma a tha
LPS Fight Night 2 hi a hmunah entu an awm thei dawn lova, pay-per-view a pekchhuah tur a nih avangin live a pekchhuah a ni dawn lo.
LPS Vision pawttute hnenah Cable PPV Home unit khat Rs 60-a hralh chhuah tur a ni a, hemi ti tur chuan mahni cable operator-te bia in a lei theih.
LPS Fight Night hmasa zawkah hun tepter tawh taka PPV lei tumte zingah tihfel hman loh a awm a, hei vang hian enna tur tihfel hma a him ang.
Khawvel huapin a duh apiang en theih turin Chhambal Application PPV hmanga pek chhuah a ni dawn a, unit khat Rs 100+ tax a hralh tur a ni ang. Heta tanga sum hmuh 85% hi Mizo boxer pasarihin an insem ang a, a bak 15% chu Chhimbal Application-in an chang ang.
Hlawh a pung mai thei
IBA intercontinental title inchuh tur Biakkima leh Kumsahwat hian Dollar 1500 ve ve an hlawh dawn a, chutihlaiin IBA-in Thai boxer hlawh tipung turin LPS Fight Night hnenah ngenna an thlen tih Organising Committee Chairman Lalsawmliana chuan a sawi a, dollar 500 ve ve in an hlawh tur tihpun a ngai mai thei a, an la ngaihtuahho leh tur thu a sawi bawk.
LPS Fight Night 2 Fight Card
Main Event – IBA Intercontinental Title (Round 10)
Nutlai Lalbiakkima (India) – 2 win, 0 loss, 0 draw
Gerttipong Kumsahwat (Thailand) – 6 win, 9 loss, 0 draw
Undercard
Featherweight – Round 6
Laldingliana (Mizoram) – 1 win, 0 loss, 0 draw
Rohit Mehra (Haryana) – 2 win, 1 loss, 0 draw
Super Lightweight – Round 6
Vanlalawmpuia (Mizoram) – 2 win, 0 loss, 1 draw
Suresh Pasham (Hyderabad) – 2 win, 1 loss, 0 draw
Super Bantamweight – Round 6
F Zoramchhana (Mizoram) – 2 win, 0 loss, 0 draw
Sandeep Singh Bhatti (Punjab) – 4 win, 2 loss, 0 draw
Super Welterweight – Round 6
C Lalhruaitluanga (Mizoram) – 1 win, 0 loss, 0 draw
Kamal Kant (Rajasthan) – 4 win, 0 loss, 1 draw
Lightweight – Round 6
HC Lalramfela (Mizoram) – 1 win, 0 loss, 0 draw
Parash Chauhan (Gujarat) – 0 win, 0 loss, 1 draw
Super Middleweight – Round 4
H Lalrinhlua (Mizoram) – debut
Subin Augustine (Hyderabad) – 1 win, 0 loss, 0 draw