Sinlung hills council chief executive member atan Biaknunga lakluh a ni a. Nimin khan Aizawl bawrhsap Dr. Lalhriatzuali Ralte-in rinawmna thu tiamtirin a lalut a ni.
Sinlung hills council CEM Lalthlamuana Hmar chuan tun thla ni 10 khan banna a thehluh avangin, tun thla ni 23-a Sinlung hills council general council meeting-ah Saiphai bial atanga thlan tlin Biaknunga chu CEM atana chuhtu awm lova tlinga puan a ni a. Sorkarin a pawm hnuah nimin khan lakluh a ni ta a ni.
Sinlung hills council CEM thar Biaknunga hi Saiphai khuaa piang leh seilian niin, kum 1992 ah HPC underground a zawm a. Hmar peoples’ convention (HPC) leh Mizoram sorkarin kum 1994-a inremna an neih hnua Hmar people’s convention-democratic (HPC-D) a pian khan Deputy Army chief niin, 2018-a HPC (D) leh Mizoram sorkar an inrema Sinlung hills council a din thlengin he mawhphurhna hi a chelh a ni.
SHC interim term council-ah Deputy chairman niin, kum 2019-a SHC general election-ah Saiphai bial atangin thlan tlin a ni a. HPC leh MNF thawhhona council-ah Deputy chairman a nih laiin, CEM ni laiin banna a thehluh hnuah CEM turin chuhtu awm lova tlinga puan a ni.