Aizawl Two Wheeler Taxi Association (ATTA)-in sorkarin two wheeler taxi permit pek chhuah leh a tum duh loh lantir nan flag dum an tar a, permit pek chhuah belh tawh rih lo turin sorkar an ngen.
ATTA chuan Mizoram sorkara Transport department-in two wheeler taxi permit pek chhuah leh a tum chu \ha lo an tih thu leh hriatthiam harsa an tih thu an sawi a. Sorkar hmasaah two wheeler taxi 496 a awm thu leh tuna sorkar laiin two wheeler taxi permit 1,889 a pek chhuah leh tawh thu sawiin, taxi la siam loh permit pawh tam tak a la awm mek laia permit pek chhuah belh chu \ha lo an tih thu an sawi.
Kum hnih, kum thum two wheeler taxi khalh tawh, ATTA hruaitu leh pawl member zingah pawh mahni hminga permit la nei lo, nupui fanau chawm nan tak taka hmang an awm nual laiin sorkara hmelhriat nei \ha leh party mi leh sa eizawn nana hmang chuang si lo, hralh leh an tam hle tih ATTA chuan an sawi a. Induhsak nana two wheeler taxi permit hman chu an duh lo hle tih an sawi.
Permit pekchhuah leh chungchangah chief minister pawh an hmuh tawh thu leh permit pek chhuah tawh rih lo tura an ngen thu ATTA chuan an sawi a. Chief minister pawhin, “Covid hripuiin min tibuai a, rei tak hnathawk thei lovin in awm a, nunphung pangngaiin in kal ve leh dawn chauh a, hetihlaia permit pek chhuah leh chu kan la ngaihtuah lo,” tiin a lo chhang nia sawiin, tuna permit pek chhuah tumna a awm leh si chu an hriatthiam loh thu an sawi.
AMC-in two wheeler taxi stand a pekah taxi 127 chauh an ding thei tih ATTA chuan sawiin, tuna sorkar laiin permit 1,889 a pe tawh chungin stand erawh pek belh an ni lo tih an sawi a. Stand pek belh si lova permit pek chhuah fo chu hriatthiam harsa an tih thu an sawi bawk.