CM hlui hovin Meghalaya Cong-ress MLA 12-in TMC zawm


Meghalaya chief minister hlui, Mukul Sangma-a hovin Congress MLA 12 zet chuan Ningani khan Trinamool Congress (TMC an zawm.
“Hun eng emaw chen inrawn a nih hnuah Trinamool Congress (TMC) zawm kan titlu ta,” tiin Sangma chuan Shillong-a thuthar lakhawmtute a kawmnaah a sawi.
Sangma leh a thuihhruai Congress MLA 11-ten party chhuahsana TMC an zawm tih a puan rualin Congress chuan India ram hmun hrang hrangah pawh eptu party lian ber an nih angin engmah an ti lo niin a sawi.
“Trinamool Congress nena inchhun fin kan titlu ta,” tiin chief minister hlui hian a sawi.
“Mipuite tana rawngbawl duhna rilru atanga he thutlukna hi siam kan ni a. Kum 2018 assembly inthlanah khan sorkar siam theih ngei kan inrin laiin kan thei lo va. A hnua kan chet vel dan zelah kan member-te hi a hnawt tiau a ni,” tiin Sangma chuan a sawi.
“Kan zavai hian tum thuhmun nei kan ni a. State tana thawh duhna hian engkim a khum vek a. Eptu kan nih anga kan tih tur tam takah kan hlawhchham a ni,” a ti.
Sangma leh Charles Pyngrope chuan I-PAC head Prashant Kishor chu TMC-a an luh duh chhan lian ta a nih thu an sawi bawk.
Kishor-a hi TMC chief leh West Bengal Chief Minister Mamata Banerjee-i nena inkawmngeih tak an ni.
“Congress-ah hian awm zel ta ila eptu kan nih anga kan tih tur ang hi kan ti thei dawn lo a ni,” tiin an sawi.
Hetih lai hian Sangma hian NPP-BJP an tanho a rin loh thu a sawi bawk.
“NPP hi BJP-in an tun din ang deuh a nihna a awm a; mahse, party pahnih hi vawi eng emaw zat an lo insawisel tawn tawh thin,” a ti.
“He hmunah hian a hranpa hlaka bei turin kan awm dawn a. Congress hi eptu a nihnaah a hlawhchham a. NPP hi BJP thawhpui a ni bawk a. TMC chiah hi a hranpa hlaka awm awmchhun a ni,” tiin chief minister hlui Sangma hian a sawi.
An party an buai mek avang hian Congress party-a Meghalaya in-charge Manish Chatrath chuan Ningani khan Shillong a thleng ve nghal.
Chatrath-a’n Meghalaya a tlawh tur hi Nilaini zan atanga Congress MLA 12-ten TMC an zawm dawn tih sawi a awm khan tihfel ve nghal a ni.
TMC zawm ta Congress hruaitute hian Nilaini zan khan an kal zel dan tur chungchangah hian Assembly Speaker Metbah Lyngdoh pawh ziakin an hriattir tawh a ni.
Chief minister hlui, Sangma-a bik hian kar khat pawh la liam lovah khan Delhi-ah AICC hruaitute a lo hmu tawh a, a hnu lawkah party a chhuahsan leh ta a ni.
Congress party chhunga buaina hi party chief atana Lok Sabha MP Vincent Pala ruat a nih atangin a ni a, August-a ruat a nih khan Sangma chuan amah pawh an rawn lo niin a sawi.
TMC hian tun hnaiah India hmarchhakah huang zauh tuma beiin an thawk nasa hle a. Tripura-ah pawh insawh nghet mekin rorel lai, BJP nen pawh nasa takin an innawr mek reng a ni.

Leave a Reply

Your email address will not be published. Required fields are marked *

error: Content is protected !!