Mizoram sorkarin two-wheeler taxi permit pek chhuah thar a tum avangin lungawi lohna lantirin nimin khan Aizawl Two-wheeler Taxi Association (ATTA) chuan flag dum tar tanin, tun thla chhung sorkar ngaihchan an tum.
The Zozam Times zawhna chhangin ATTA President Lalhmunmawia chuan, tuna Mizoram sorkarin two-wheeler taxi permit pek chhuah thar duh loa lungawi lohna lantira flag dum an tar chuan zawm a hlawh hle niin a sawi a. “Kan pawl member zawng zawng chuan kan tar vekin ka hria a, member-a la inpe fel chiah eng emaw zat awmte pawhin lungawi lohna kan lantir hi min thlawp hle a ni,” a ti.
ATTA President Lalhmunmawia chuan lungawi lohna lan tira flag dum tarin tun November thla chhung hian lungawi lohna an lantir phawt tur thu a sawi a. “Tunah rih chuan a la hma bawk a, lungawi lohna kan lantir hi a ni khatna chauh a ni nen, sorkar lam atangin emaw, transport department lam atangin emaw engmah thu thar kan la hre lo va. Eng pawh ni se, tun kar leh chawlhkar thar tir lam hun a la awm bawk a,” a ti.
An hun tiam chhunga sorkar lam atanga an beisei ang chhanna leh hmalakna an hmuh loh chuan hmalak dan thar tur an la ngaihtuah chawp tur thu sawiin Lalhmunmawia chuan, “Sorkar hian pek luih a tum deuh ni chuang kan hria a. Chuvangin, lungawi lohna kan lantir hian awmzia a nei lo a nih chuan hmalak dan thar tur chu kan la ngaihtuah chawp leh chauh ang. Tunah rih chuan hmalak chhoh dan tur hi kan la sawi ho lo a, la rel leh tura a ni,” tiin The Zozam Times a hrilh.
Lalhmunmawia sawi danin, kumin December thla chhung hian tuna two-wheeler taxi permit pek sa eng emaw zatin taxi-a siam mek eng emaw zat an awm belh dawn a. Hengte nen hian Aizawl khawpui chhungah two-wheeler taxi chu a pun belh leh hluai dawn nia a hriat thu a sawi.
ATTA hian November 24, 2021-a thuchhuah an siamah Congress sorkar hmasaah khan Two Wheeler taxi hi 496 chiah awmin, tun MNF sorkar tharah kum thum chhungin permit 1,889 pek a nih tawh thu an tar lang a. Aizawl Municipal Corporation (AMC)-in two wheeler taxi stand a pekah hian taxi 127 chiah an din theih thu leh stand pek belh tum si loa permit pek belh tum leh a ni chu hriatthiam harsa tiin, lungawi lohna lantir hi an tum thu an sawi a ni.