Congress party chuan Swadesh Darshan Scheme II hnuaia hnathawhnaa thil dik lo awm nia sawite chu Mizoram Lok Ayukta chhuitir mai duhtawk lova CBI chhui ngei an duh thu an sawi.
An thuchhuahah MNF Vigilance Department leh Legal Board-ten Swadesh Darshan Scheme II hnuaia Mizoram tourism hmasawnna tura hmalakna hrang hrangah thil dik lo leh fel tawk lo a awm ngei nia a lan avanga Mizoram Lok Ayukta-a complaint an thehlut chu lawmawm an tih thu an sawi a. Tourism Minister Robert Romawia Royte-in Lungdai khaw mipuite hmaa a lo sawi tawh ang ngeiin he buaina hi CBI chhuitir ngei nise an duh tih Congress party hian an sawi.
Congress party hian thil kal tawh hrang hrangte thlirin, MNF sorkar thuneihna hnuaia chhui a nih chuan dikna a lal loh a hlauhawm avangin, Mizoram Lokayukta hian an hnena compalin lut hi CBI chhui tir ngei sela, MNF sorkar pawhin CBI chhui phalna hi pein harsatna siam suh se tih chu an duhdan a nih thu an sawi bawk.
Sakawrhmuituai tlang Sky Walk leh Durtlang – Chaltlang Ropeway Project hnathawhnaa thil dik lo awm nia sawi te hi a chin chhuaka chhui ni se la, dan bawhchhiatna a awm ngei a nih chuan dan bawhchhetu chu politician an ni emaw, official an ni emaw, dan ang takin an chungah action lak ngei ni se tih chu Congress duhdan a nih thu an sawi a. “A taka thil dik lo haichhuak tur leh siamtha tura hma la ngam tak tak si lo a, politics a hamthatna hmuh tum ringawta che vel reng kan awm thin hi Congress Party chuan tha lo a ti,” an ti.