Congress Thalai President Dr Lalmalsawma Nghaka chuan nimin khan Two-wheeler khalhtute thlavang hauhin nimin khan Aizawl Municipal Corporation (AMC) Commissioner K Laldingliana, MCS, chu a pisaah kawmin two-wheeler taxi permit pek belh tawh lo turin a ngen.
Dr Lalmalsawma Nghaka hian Aizawl khawpui dinhmun enin, tun dinhmunah sorkar hian two-wheeler taxi permit pek belh rih tawh lo turin Mizoram sorkar leh AMC Commissioner a ngen tih a sawi a. Tuna two-wheeler taxi khalhtute dinhmun leh an harsatna tawh mek hi rang taka enfiahpui an ngaih thu a sawi bawk.
Permit petu transport department-in AMC chu permit pek belh dawnin an rawn lo a nih chuan a kalphung lo hle tih a sawi a. “Permit tam tak pek belhin Aizawl khawpui a nghawng tur leh harsatna a thlen tur lam an ngaihtuah lo niin a lang. Aizawl khawpui hi traffic jam awm lohnaah kan siam ang titute hian ngaihtuahna an seng tak tak lo,” Dr. Lalmalsawma hian a ti.
Congress thalai president hian an sorkar laiin tam tak pek chhuah duh mah se, khawpui dinhmun leh eizawnna atana hmangtute dinhmun enin a tingam lo tih sawiin, two-wheeler taxi permit 691 pek chhuah anih thu a sawi a. Hetih lai hian, MNF ministry thla li chhung chauhin March 4, 2021 thleng khan two wheeler taxi permit hi 1,889 lai pek chhuah a ni tawh thu a sawi bawk.
AMC Commissioner K. Laldingliana hian Congress thalaiin an thu thlente chu AMC Mayor te nen an lo sawi ho dawn bakah, committee kovin an lo ngaihtuah tur thu a sawi a ni.