I bialpa in a ban che tiraw?

Bialpa thar neih hi thil awlsam tak a ni lova, bialpa then phei hi chu a thawpik thlat thin ngawt mai!

A ban che emaw i ban emaw pawh nise, hun engemaw chen in lo inzui tawh avangin a tlem emaw a tam emaw chuan nâ i ti ve thovang. Puite-i chu a bialpa-in a ban thut mai a, awmdan tur pawh a hre tawh lova, kal zel dan tur phei chu hla tak a ni!

Engmah a hrethiam tawh lo. Nun hi ho a ti a, atthlak a ti a, a indem ngawih ngawih. A hna-ah a tui tawh lova, a thianthate’na an thlamuannate pawh chuan eng a ang bawk si lo. A thla telin a tuar a, mahse nikhat chu a tan beiseina kawl a lo eng ta tlat mai. Hrehawm a tihna leh a tawrhna zawng zawng chu a reh nghal duak mai.

A tawpna hi a kha a ni!
Hmangaihna lipuiah i cheng a, hun hlimawmin a hmuak che a, tudang i ngai lo. Nikhat chhung lek pawh i bialpa hi awm ta lo se… tihte phei chu i ngaihtuah ngai reng reng lo. Tichuan zawi zawiin i lawn chho zel a, a chhip i thlen meuh chuan thawklehkhatah tek nasa tak mai a lo eng chuai chuai a. I bialpa chuan inthen a rawt ta a le, khuanu ruat kan ni lo a tih meuh chuan, inthen chu kawng awmchhun a ni tawh mai. Thlaler ramro-ah vakvai mai i ni ta, khawnge tui hna thar awmna chu ni ta ang?

Muang mar zawkin
Tunah chuan i nun chu pawhsawm ang maiin a darh nuai a. Hnemtu i ngai ngawih ngawih. I khawharna ruak huau mai chu hnawhkhah i duh nghal ang. Mahse, hman-hmawh duh suh. Tuna i dinhmunah kha chuan level danga i kai hi a tha ber lo a ni. I hliam dam hun nghak phawt ta che. Kawmnuam leh nel-awm tak nih tum hram hram la, thian siam tum ang che. Mahse, bialpa neih nghal thawt thawt tum suh. Engtik lai pawha chhas neih reng hi ‘compulsory’ a ni lo. Chuvang chuan date pui tur zawn nghal rum rum loh hi i tih tur a ni.

No to Drugs
Inthenna hian hun harsa tak a rawn chhawm lut ve nghal a. Khawvel hmachhawn thei ziazanga inngaih lohna a lian hle thin. Mahni induhtawkna pawh hian a hniam lai ber a thleng thla chawt a. Second tin mai hi hremhmun note an chang zo ta! A thawi dam nan Zu leh ruihhloah i tuan a ni thei. Mahse, hengte hian an chhawk zangkhai dawn lo che a, harsatna an siam belhchhah zawk ang che. Mahni leh mahni inkhawngaih chunga thil tha lo chin hi zawhloh nghawngkawl inbahna mai mai a ni.

Inhmu chiang rawh
Tunah khan khawvel hi a tawp dawn ta maia inhriatna pawh i nei ang. Mahse, hei hi hrereng ang che. Tawp hun a awm angin tan hun hi a awm thin ngai e. He manganna leh harsatna atang hian tunge i nih a, engang mi zia nge i put tih hi chiang fekfawkin a rawn lang dawn a, inhmuh chhuah tum rawh le. Zawhna in zawt la, inhriatthiam tum bawk ang che. Nuam i tih zawng ti la: ke-a kal te, lehkhachhiar te leh thil dang hlimawm lamah i rilru pe la. A chang chuan khawharna te hi khawvel hun tawt leh hahthlak takah hian malsawmna a ni thei ve tlat! Inthen/inbanna hi tawrhhrehawm tak leh paltlang harsa tak a ni a, tuna i tawrh ang khan tuman an rawn tuar pui thiam hek lo. Broken heart hi thuizawm a harsa hle na a, tih theih loh hulhual erawh a ni hauh lo.

Hei hi hrereng ang che. ‘Mal-in i awm lo’ (You are not alone). Nupa emaw inkawpte pawh nise hun khirh tak hmachhawn a, ding khawchhuak te hi an tlem lo.

A tirah chuan a harsa mai thei e, i thunun zawh rual loh thil a lo awmte hian huaisen taka pawm ngam tum la, thlamuang taka awm hram tum rawh.

I hun neihte a tha thei ang berin hmang la, kar lovah i tana khuanu ruat ngei chu i tawng ngei ang.

Leave a Reply

Your email address will not be published. Required fields are marked *

error: Content is protected !!