EDITORIAL 26/11/21


Assam in kawng dangin hma an la leh ta em ni?

Tun hnai khan phai media lian thenkhatten Assam leh Mizoram ramri chungchangah Mizoram zawkin hma an la la chhunzawm reng niin an sawi a, Assam lam zawk hian drone hmanga thlalak thenkhat nei nia insawiin, Mizoram lam thiam loh kan chan theih dan ngawr ngawr an zawng leh tan a, en liam mai chi niin a lang lo.
Hetianga ramri chungchanga inpuh tawnna a thlen lai hian Mizoram sorkara hotu pawimawh tak pakhat chuan Assam sorkarin drone footage an thehdarh chu tun hnaia lak a ni lo a, file footage a nih zawk thu sawiin, Assam lamin an puhna chu thu dik lo a ni tiin, ramri pelin hmalak a ni lo tih a sawi ve thung a, kan ram hruaitute hian engtin tak chhang zel ang i maw?
Vairengte daia state pahnih police-te an inkah hnuah hian ramri chungchangah boruak tha lo lian tham a thleng tawh rih lo a, hetihlai hian Assam lam erawhin Mizoram chhungah buaina tenau erawh an siam reng thung a ni. Chuti chung chuan phai lam media lian thenkhatah an thiamchan theihna tur zawngin hma an la leh tan niin a lang a, en liam mai chi niin a lang lo.
Kan buaina hi kan sawi fo thin angin reh mai thei a ni lo a, sawifel nghal vek theih lah a ni hek lo. Chuti kan ni chung chuan ngawidawh reng tur erawh kan ni bik lo a, a theih ang anga kan invawrh ve a, kan sorkar hotu leh officer lian zawkte pawhin media war kan hman thiam a, kan beih thiam ve tawh hi a tul hle. Chutiang tur chuan a ti mi zawn a, party politics sawi lo a, ram leh hnam tana kan tanrual pawh a ngai hle bawk.
Sorkar bawk hi a fawng vuantu an nih miau avangin beiseina a sang lo thei lo a, media hmanga indona khawvelah hian hma an lak thiam zel pawh a tul awm e.

Leave a Reply

Your email address will not be published. Required fields are marked *

error: Content is protected !!