Germany chuan an rama coronavirus avanga thi chu mi 1,00,000 an tling ta tih an puang a, sorkar tharin mawhphurhna la tura an inbuatsaih mek laiin hri leng nasa takin a tuam mek.
Europe-a economy lian ber ramah hian darkar 24 liam ta chhungin mi 351-in Covid-19 hi thihpui leh hmanin a len tan atangin mi 1,00,119 an thi ta niin Robert Koch Institute (RKI), public health agency chuan Ningani khan a sawi.
RKI-in a chhinchhiah dan chuan chawlhkar bi zela kai thar pawh an pung hle a. A san lai ber tawngin mi 1,00,000 zela mi 419.7-in an kai niin an sawi.
Germany hi hripui a len tirh lamah khan European ram zinga him ber leh a beit letna lama hlawhtling ber zinga mi an ni a; mahse, tun hnaiah nasa takin a kai pungin intensive care khumte chu a khat chak hle.
Thla tharah hian Angela Merkel-i cabinet thlak turin tangrual sorkarin mawhphurhna an chelh tan dawn a, hmalakna tur hautak tak an nei nghal.
Germany hi Europe-ah chuan hri leng hmunpui thar ni mekin khawmualpui pumah hri inkai a chak leh hle tawh a. Ram tam takin invenna pek an uar sah va. Inkai awlsam, Delta variant, khaw vawt avanga in chhung luma thiltih tam leh inkhuahkhirhna thlahdulte chu a darh chak leh chhana puh a ni.
AFP news agency-in a chhinchhiah dan chuan kar hmasa khan Europe-ah hian mi maktaduai 2.5 chuang kai hmuh niin mi 30,000 dawnin an thihpui bawk a. Hripuiin a beih nasat leh ber hmun a ni mek.
Heti taka hripuiin a beih nat avang hian damdawi in pawh an indaih lo tan a. European Union-a ram dangte pawhin puih zai an rel tan.
Damdawi in tam takah chuan enkawl sen loh damlo an nei a, loh theih lohvin COVID-19 kaite hi ram pawn lama thawn chhuah an ngai niin German Interdisciplinary Association for Intensive Care & Emergency Medicine-a an hotupa, Gernot Marx chuan a sawi tih AFP-in a tar lang.
Germany-ah hian kar hmasa atang khan inkhuahkhirhna khauh deuh zawk kalpui niin heng zingah hian invenna la tawh tih chianna te, COVID-19 vei tawh dam leh tih chianna leh hri kai lo ngei a ni tih chianna chu zin chhuah dawn emaw, hna thaw k tur emawin neih tura tih a ni.
A tuar na zual ram bialah chuan pun khawmna lian ang chi , Krismas bazar thlengin khar a ni a. Invenna la lote chu bar, gym leh pun khawmna danga an tel phal a ni lo.
Hri kai an pun leh chiam mek lai hian mipui zingah pawh inhnialna awmin Austria anga invenna lak chu tih ngei ngei tura tih ve mai a tha em tih chu sawi a awm a, mipui ngaihdan a darhsarh hle.
Merkel-i thlaka chancellor thar tur, Olaf Scholz chuan damdawi ina thawk bikte chu invenna la ngei ngei tura tih chu a duh thu a sawi a, ‘hun harsa an tawn mekah sorkar chuan himna tura tih theihte chu a ti zel dawn’ tih a sawi bawk.
Germany-ah hian COVID-19 darh leh chhan hi an ram mipui zinga 69% chauh invenna la an la awm vangah puh a ni a, European khawthlang ram dangte aiin a la an la tlem zawk hle a ni.
RKI-in a chhinchhiah dan chuan hri kai mi 55,73,756 an awm tawh a; mahse, a tak takah chuan hei aia tam daih an ring a. Enkawl dam tawh pawh mi 47,44,400 an awm tawh.