Fa neih i inpeih chiah maw?

A nihna takah chuan, “NU” ni turin ‘100%-in ka inpeih tawh e’ tih hi a theih loh hulhual a. Engtiang khawpa taksa leh rilru-a inpeih-na nei tawhte tan paw’n, ‘Nu dinhmun’ hi tawnhriat thar leh danglam tak a la ni zel.

Tunah khan i ruak lo emaw, ‘a hun tawh e’ tite pawh ni la, thil tul leh hriat awm takte hriat a, rilru-a vawn reng hi i tih tur leh mawhphurhna lian tak pawh a ni.

Chhungkaw din tumna lo awm ta nghala hi thutlukna lian tham tak a tling pha a, chuvang chuan, a chhan leh vang mumal tak behchhan lo chuan tawngpawng luhchilh a, thutlukna siam vut vut te hi a him lo tih hriat a tha.

Nau nei turin i inpeih tawh a nih chuan, heng a hnuaia tarlante hi ngaihtuah nawn tluk tluk turte an ni.

NUPA NUN INHMANG TAM THEI DAWN LO
Invenlawkna neih theih a ni lova, inhmakhua-na ang chi phei chu he thilah hi chuan awmzia a nei tehchiam lo.

Engle khaw le, in inkara naute lo piang tur hian in nupa nunah nghawng na tak a thlen dawn a, i beisei loh leh rinngam loh danglamna te pawh a lo thleng zut zut ang.

Nu i ni tawh dawn a, tunhma zawng aiin engkimah mamawh (demand) a sâng hle tawh anga, i hun leh tha zawng zawng hian a daih loh lek lek thin tih i hmuchiang nghal bawk ang.

Hemi avang hian pasalte tan hun i nei tlem tial tial dawn a, a bula pangchang taka khawsak leh lenchhuah pui emaw, bazar tura han sawm velte thlengin i châk zek zek tawh lem lovang.

Hengte hi a khuh hawnna mai a ni a, a bak, thil dang pawh ngaihtuah zui tur a tam khawp mai.

I HREHRANG HLEI TAWH DAWN LO
Naupai chhung zawng hian kawng hrang hrangin i taksa khan ‘danglamna’ mak pui pui a paltlang nasa hle a, thawklehkhatah i rihna kha a kiam nghal duak dawn!

Tichuan, zawi zawiin i rihna hi a hniam nghal zel anga, darthlalanga han inen ta khan hawi hu hu a, kâ hup leh zauh zauhte hi i tan thil thar a ni dawn lova, a lo thleng ve nghal mai ang.

I duh emaw duh lo emaw, i zahpui emaw pui lo emaw, i awmbawr zawlaidi (Hnute) lian tak kha ngainat thar thut dan i zir tan dawn anga, nulat laia piannalh zeih zawih, vengchhung leh pâwn lamah te pawh tlangval te sep rawn thina kha tunah chuan a lo danglam zo ta. I kawngbawr han en mai chuan thil ni thei te paw’n i hre lo hial thin ang.

RILRU SUKTHLEK MUMAL LO
Inchei leh intuaihnum tih vel kha ‘hobby’ list-ah an lang tawh lova, nau neih hnu khan an bo ve nghal duak ang. Nalh tumna em em leh mawi loh hlauhna thlarau khan tunah chuan zawi zawiin a kian san hret hrek bawk ang.

Pasal zei te bawk hi hahdampui tham an tling. He-tianga i taksaa danglam hrang hrang lo thleng hi a pawm a, a hre-thiam bawk anih chuan mi vannei an tihte zinga chhiar tel tur i ni ngei ang.

Nau neih hnu-a rilruhahna (Post Partum Depression) a awm dawn a, pasalte nena mumal taka sawi dun a tha. Naute \ap reng bawk nen chuan thawpik a zual a, a thawven thlak loh thin hle.

Khai le, sawi tawh angin, a khuh hawnna lek a la ni a, heti chung pawha fa neih ngei chu duhthlanna pawimawh tak a ni tih hria a, kaltlang pui tumna a awm bawk chuan, ‘engkim mai hi a lo tha vek e’ tih ang deuh kha a ni.

A tawpah zawng, tawrh man a awm thin a, inthlah pung tura Siamtu remruatna tihlawhtling tute zingah i tel ve hrim hrima hi a ropui hle a ni.

Leave a Reply

error: Content is protected !!