Kum 120-na pual 650 twin pahnihah limited edition tichhuak dawn

Royal Enfield chuan an company kum 120-na pualin Interceptor INT 650 leh Continental GT 650 120th Year Anniversary Edition chu EICMA 2021 ah an phochhuak a. He bike hi 480 chauh an siam ang a, khawvel pumah an hralhchhuak dawn a ni. Heng zinga 120 hi India, Europe, America and South-East Asia ah te an pechhuak dawn.

Royal Enfield Interceptor 650 leh Continental GT 650 120th anniversary edition hi Royal Enfield history hlu tak mai phochhuak tura duan a ni a. Royal Enfield hian an bike hmasa ber chu Stanley Cycle Show, London-ah kum 1901 November thla khan an phochhuak a ni.

BOOKING LEH SALE
India ramah chuan 120th Year Anniversary Edition Twins te hi December ni 6-ah hian limited time online sale neih a ni dawn a, hei hi an website-ah – www.royalenfield.com/120thedition ah a tih theih dawn a ni. Lei duh tur te chuan nimin atang khan an in register tan thei tawh a, hei pawh hi website-ah tho tih tur a ni. An hralh dan tur kimchang chu registered email address company lamin an hrilh dawn a ni.

ENGNGE 120TH YEAR ANNIVERSARY EDITION-AH KAN HMUH DAWN
120th Year anniversary edition Interceptor 650 leh Continental GT 650 hi UK leh India chhunga Royal Enfield company team ten an duang a. Heng bike pahnih te hian rich black-chrome tank colour scheme an tih chu a pu a. He an chrome-na hi eco- friendly vekin an kalpui a ni.

A vawikhatna atan Continental GT 650 leh Interceptor 650 te avaiin a dum hlang (completely blacked out components) a ni dawn a, hetah hian a khawl bakah a silencer leh thildang pawh a tel vek a ni. Hei hi a ‘black chrome’ tank dum nalh tak nen pawh a inchawih hle a. A mawi viau a mai, a lei thei thei chu an vannei dawn hle a ni. 120th Year Anniversary edition bike pahnihte hian handcrafted, die-cast brass tank badge a nei vek bawk a ni.

Royal Enfield chuan heng badge ‘sial’ tak te hi ‘SirpiSenthil’ family an tih, Kumbakonam, Tamil Nadu-a temple a awm, kum rei tak chhung an thlahtute atanga mi themthiam tak te nena thawkhoa duan a ni. He chhungkua hian temple-a bungraw hlu thenkhat chu chhuan eng emaw zah chhung an siam thin a, tun tum hi lirthei company nena an thawhho vawikhatna a ni. Heng lirthei pahnihteah hian Royal Enfield lirtheia kan hmuh thin kuta rin kual tiin sawi mai ila, hand-painted pinstripe hlu tak mai chu kan hmu dawn bawk a ni.

A tank top badge hian unique serial number 1 atanga 60 chu khawvel hmun hranga hranga chhuak te hian an nei ṭheuh dawn a. Heng bike pahnihte hian side panel decal, Royal Enfield 120 years tih chuang a nei ve ve bawk a ni. He limited edition bike pahnihte tan hian Genuine Motorcycle Accessories hrang hrang – flyscreens, engine guards, heel guards, touring & bar end mirrors te a milpui tur thlapin rawng dumin lei tur chu company in an siam vek bawk.

OFFICIAL STATEMENT
An tlangzarhnaah hian, Siddhartha Lal, Managing Director, Eicher Motors Ltd. chuan Royal Enfield in history ropui leh hlu tak a neih ang chu brand tlemte chauhin an nei thei tih sawiin, hei hi an lirthei ngainatute leh lei thintute vang a nih thu a sawi a. “120th Anniversary Edition 650 Twin kan tichhuak thei hi kan lawm hle a ni,” a ti a ni.

Leave a Reply

Your email address will not be published. Required fields are marked *

error: Content is protected !!