Prime Minister Narendra Modi chuan Ningani khan Jewar, Gautam Buddha Nagar, Uttar Pradesh-ah Noida International Airport siamna tur lung a phum.
Thu sawiin prime minister chuan he thlawhna tumhmun siam tur hi India-in tun lai thiamna changkang zawk hmanga hmasawnna kawng a zawhna tura rahbi pawimawh a nih thu a sawi.
“Tun lai thiamna changkang zawk hi kum zabi 21-naah India thar dinna tur a ni,” a ti a. Kawngpui, rel leh thlawhna tumhmun thate chu hmasawnna ruhrel dinna mai a ni lo va, mipui nun thlak danglamsaktu a ni tih a sawi bawk.
Tumhmun thar tur chuan Uttar Pradesh eibar dinhmun, a bikin state khawthlang lama mite a chawikang dawn niin a sawi.
“He thil hian mipuite tan hna tam tak a siam dawn a ni mai lo va, heng lai bawra mite hi thil thawn chhuah tam zawk a neihtir dawn a ni,” a ti.
Noida International Airport chu ‘logistics gateway of Northern India’ tia sawiin Modi-a chuan, “He tumhmun hi nakin lawkah chuan thlawhna cheibawl leh thawm thatna hmunpui a ni dawn a, bungraw thawn chhuahna lamah pawh mite entawn a ni thuai dawn a ni,” a ti.
Sorkar hmasaten Uttar Pradesh hmasawnna tur an ngaihthah thin tih sawiin, “He state mipuite lo suangtuah thin kha a dik lovah an chantir zel a ni,” a ti a. BJP sorkar hnuaiah chuan ram leh khawvel huap pawha hmasawnna hmun a nih tawh thu a sawi a. India-in zalenna a neih atanga kum 70 zetah Uttar Pradesh chuan a phu ang thil a dawng ve tan ta tih a sawi bawk.
Thlawhna tumhmun siam tur lung phumnaah hian Chief Minister Yogi Adityanath, Union Civil Aviation Minister Jyotiraditya Scindia leh state minister thahnem tak an tel.
Chief minister pawhin thu sawiin Noida International Airport chu Uttar Pradesh khawthlang lam tana hmasawnna kawng hawngtu pawimawh a ni dawn tih a sawi a, mipuite tan hna tam tak a siam dawn niin a sawi.
Civil Aviation Minister Scindia pawhin tumhmun hi a taka a chan hunah chuan Rs. Vaibelchhe 60 hu zet investment a hmuh dawn thu a sawi a. “Mi nuai khat chuang tan hna a siam dawn,” a ti bawk.
Sorkar kal mek hian kum sarih chhungin thlawhna tumhmun 62 a siam tawh thu a sawi bawk.
Noida International Airport siam turah hian a cargo terminal bik chu bungrua metric tonne nuai 20 dawl zo tura duan a ni dawn a, metric tonne nuai 80 thleng dawl zo tura tihlen theih tura duan a ni dawn bawk.
A awmna hmun hi India ram chhunga khualzinte hip tak tak hmun – Agra, Vrindavan leh Mathura atanga hla lo tak a nih avangin tourism industry tan pawha hlawkpui theih tura ruahman a ni.
Ram hectare 1,300-a zau a awh dawn a, kum khat chhunga passenger vaibelchhe 1.2 vel dawl zo tura ngaih a ni.
Tumhmun siam thawh khatna hi kum 2024-a zawh hman tura ruahman a ni a. Rs. Vaibelchhe 10,000 senna tur a ni.
Sorkar hmathlirah chuan ram chhunga thlawk leh ram dang nena intlawhpawh chi thlawhna a luhchhuah dawn avangin a bul hnaiah khawvel huap company liante inbun tura sawmtu tha a nih rin a ni.