- H. Lalhmachhuana
Zobawm
State Sorkar sumhnar pui ber te chu Central Sorkar atanga hmuh an ni zel a. Khawvel pum huapa Covid-19 hripui lengin India ram Economy pawh namen lovin a hrek avangin State Sorkar ten Central atanga kan sum hmuh beisei chanve pawh kan hmu thei hlawm lo a ni a. Heti khawpa sum lama harsatna kan tawh takah chuan Mizoram State Sorkar (leh mipuite) hian sum hnar dang siam/neih dan zirchhuah a,hma lak nghal a tul tak meuh mai a.
Tichuan ram mipui tana sum hmuhbelhna tur ngaihtuah theih awm thei zingah rawtna awm thei pakhat tarlang ila, ngaihtuah a zirchian tlak tak a niin a lang a, chu chu –
Land Revenue kan tih thin huam chhunga dah pawh a theih ang a, huan emaw leilet emaw farm emaw nei te atang hian land rent or fee lak vek ni se la, khawtin V.C. ten an ram huam chhunga huan emaw leilet emaw nei zawng zawngte chhiar vekin an ram hlut zawngte chhutchhuah dan Sorkar ruahman anga record vek ni se la; tin an fee/rent (chhiah) khawn pawh V.C. ten thawk vek mai se, Sorkarin 75% leh V.C ten 25% emaw a insem tura tih ni se; tin, V.C. te chuan khawtlang mipui mamawh atana an hmanna tur (e.g. vengchhung inkalpawhna kawng siam ,etc.) siam sa vek ni bawk se. Heti hian huan leh leilet emaw hman tangkai ngei tumna/tulna lamah kan thangharh zawk ang a, kan ram leilung hausakna kan chhawr nasa zualin intodelh leh hmasawnna lamah kan thang chak zawk bawk ngei ang.
Tun hun thlenga Mizoram chhunga khua zawng zawngah leh AMC huam chhungah ngei pawh, huan leh ram, neitu awm si, enkawl loh rula raw neih tam tak an awm a, thenkhat phei chu pass/permit mumal pawh nei lo te an awmin a lang a, ram hausakna haichhuah nana hun thar herchhuak ah ngai ila a dik hial awm e.
He rawtna hi India Constitution Seventh Schedule List II, State List in a tarlan danin State Sorkar hmalak theihna a ni a. A ram leilung hi mipui aiawha roreltu State Sorkar thuneihna a ni a, chuvangin a ram leilung hman man (fee or rent) sorkarin a lak (huan or leilet or farm) neitu hnen atangin a ti thei tur a ni a, tuma sawisel tur chi a ni hran dawn lo a ni. Amaherawhchu a ram leilung hausakna haichhuah – buh leh thlai, etc. atanga chhiah (tax) lak erawh a thiang lo thung tih hriat a tul a ni.