Revenue Minister Lalruatkima’n Hualngohmuna Mizoram Surveyor Training Institute sakna turin Rs vbc 54.9 estimate siam a nih thu sawiin, sorkar laipui pawh a dawr lawk tawh thu leh a hlawhtlin ngei a beiseiawm thu a sawi.
Institute sakna tur hian planning department kaltlangin ministry of science & technology-ah tun thla ni 12 khan concept paper thehluh a nih thu minister chuan a sawi a. Thehluh hmain ministry a dawr lawk tawh thu leh a hlawhtlin ngei a beiseiawm thu a sawi.
Training institute sak tur chungchangah hian nimin khan minster chuan Hualngohmun khawtlang hruaitute a titipui a. Hmasawnna ruhrel lian din kawngah tha taka sorkar thawhpui turin a sawm.
Minister chuan kum 2008-ah Hualngohmun Village Council-in sorkar hnenah ram bigha 24.22 a hlan tih sawiin, hun bituk chhunga hmalakna a awm loh chuan ram neitu hnenah hlan leh tura thu delhkilh erawh a awm thu a sawi.
A hmun thu-ah revenue department chu thuneitu ni mah se khawtlang hruaitute rawn chu a pawimawh hmasa nia a ngaih thu leh rem an tihpui ngei a rin thu a sawi bawk.
Hualngohmun khawtlang aiawh VC member-te leh YMA hruaitute pawhin Hualngohmuna Mizoram Surveyor Training Institute din chu an duh thu sawiin, “Kum 2008 hnu lama hmalakna hmuh tur awm lova chawlhsan vang vang ang kha chu a thlen erawh kan remti lo,” an ti.
Khawtlang hruaitute an nih angin an member dangte nen committee thutkhawma sawiho erawh an tum thu leh khawtlangin lungrual taka an remtih ngei pawh an beisei thu an sawi bawk a ni.