November 26 (Zirtawpni), 2021 zing dar 5:15-ah Mizoram pum bakah, India hmarchhak state te, Myanmar leh Bangladesh-ah nghawr khawpin lir a nghing a. Mizoram chhungah shhiatna liantham thleng erawh hriat tur a awm lo.
Ministry of Earth Sciences hnuaia National Centre for Seismology-in report a pek danah chuan, a tha nghawr pek nat zawng hi M6.1 niin, leihnuai km 12-a thuka insiam a ni. Lirnghing thlenna hmun hi Myanmar ram chhung (Lat. 22o 46’11.9994” & Long. 93o13’48”) niin, Indo-Myanmar range atanga irh chhuak nia hriat a ni.
Lirnghing hi Aizawl-a Pachhunga University College (PUC) Broadband Seismic Station-ah pawh chhinchhiah a ni a. A nghing hma zanah lir hmahruai (foreshocks) tenau eng emaw zah a awm bakah, a hnukhawi (aftershocks) vawi tam tak a lo chhinchhiah bawk.
PUC Seismic Station atang hian, lirnghing nat zawng leh a thlenna hmun ai mahin, lir a nghinga a siamtu lei inpelhsawlh ziarang zirna atan data chipchiar a chhinchhiah a. Heng atang hian kan hma lam lirnghing kan tawh mai theih dinhmun thlenga zirbingnaah hriatna thuk zawk a awm thei tawh dawn a ni.
PUC Station bakah hian, Lunglei leh Khawbungah bun thuai tum a ni.
November 12 khan PUC-ah Chief Minister Zoramthanga’n Broadband Seismic Station hi a hawng a. Station hi CSIR- NEIST Jorhat leh Department of Geology, PUC tangduna hmalakna a ni a. DM&R-in station chei hnumna leh khawl mamawh lei nan leh, zirmite zin veivahna atan cheng nuai sawmpahnih a tum a, project hi kum thum atan neih a ni phawt ang.