Mizorama Covid-19 hri kai dam leh tawh zaa 20 atanga 30 bawr velin an taksaah harsatna dang an tawh avangin hri kai dam leh tawhte chu fimkhur turin damdawi thiamten an chah.
State-Level Expert Committee on Covid-19 Management member, Civil Hospital Aizawl-a thawk mek medicine specialist, Dr J Lalramchhuanga chuan?khawvel puma Covid-19 hri kai dam leh tawh zaa 20 atanga 30 inkarin an taksaah harsatna dang an tawk tih sawiin, “Mizoramah pawh zirchianna mumal tak awm rih loh mah se hetiang bawr vel tho hian an taksaah harsatna an tawk nia ngaih a ni a, Mizorama hri kai dam leh tawh zingah harsatna tawk awm mah se serious tak erawh an la awm tam lo,” a ti.
Dr J Lalramchhuanga chuan Covid-19 vei hnu hian chauh ngawih ngawih, thawhah, rilru phawklek hma (anxiety) vei zui a awm theih a, hei vang hian kan fimkhur a ngai em em tih a sawi a, a theih hram chuan taksa tana tha ei leh in tur a ni a, mut an kham tha tawk tur a ni a, tuisik tam tawk in thin a pawimawh tih a sawi.
Hri kai dam leh tawh tan zu leh a kaihhnawih in loh a tha a, zuk leh hmuam tih loh a him ber tih sawiin, “Covid-19 veite chu an dam atanga kar khat chhung tal hi chu la chawlh hahdam a tha a, taksa sawizawi a pawimawh rualin sawizawi dan tawk kan thiam a tul a ni,” a ti.
Hri darh thutna awm theihna a la hniam loh thu sawiin, khawpui lamah hri inkai darh hi a ziaawm hret hreta a lan laiin thingtlang lamah chuan a pung veleh thut thin a, hunpui lo thleng turah thingtlang atangin khawpuiah châkkhai lam turin kan kal nasa leh dawn a, hetih hun lai hi fimkhur hun a nih thu a sawi bawk.