South African scientist-te chuan COVID-19 chi (variant) thar kai an hmu nual a. Zir chian lehzual hna an thawk nghal a, khawvelin he hri thar hi a ngaihven nghal hle bawk.
B.1.1.529 tia an sawi hi ‘mak danglam taka a awm sa atanga insiam danglam’ tia sawi a ni a, mihring taksaa hriatna thazam tichhe theia ngaih a ni a, a awm sa mekte aia inkai darh awlsam zawk niin scientist-te chuan Ningani khan an sawi.
National Institute for Communicable Diseases (NICD) chuan genomic sequencing an tihna atangin hri chi thar hi mi 22-in an kai tih an hmu.
“Vanduaithlak takin variant thar hmuh niin South Africa tana hlauhawm thar a ni,” tiin Network for Genomic Surveillance in South Africa-a an hotu, Tulio de Oliveira chuan thuthar lakhawmtute a kawmnaah a sawi.
Variant thar hi ‘nasa taka insiam danglam’ a nih thu a sawi a. “Vanduaithlak takin inkai darh a thlen leh ang ang,” a ti.
South Africa atanga Botswana leh Hong Kong-a zin zingah pawh he hri kai hi hmuh a nih thu a sawi bawk.
Health Minister Joe Phaahla chuan variant thar chuan rilru a tibuai thar hle tih a sawi a. A lang lovah kai an awm teuh theih thu leh chu chu thil hlauhawm tak a nih thu a sawi.
South Africa-ah hian Nilaini khan hri kai mi 1,200 chuang awmin thla tir lam aiin mi 100 chuangin an tam.
Hri chi thar hmuh chhuah a nih hma pawh hian mi thiamte chuan South Africa hi December thla laihawlah, Krismas bazar hun laiin hri leng thawh linain a nuai dawn niin an sawi lawk bawk.
NICD chuan Ningania thuchhuah an siamah province pathumah tun hnaiah hri kai an pun thu leh endik zingah pawh a kai hmuh a pun chak thu a tar lang a. Hengte hi Gauteng, Johannesburg leh an khawpui, Pretoria-ah te pawh a tel.
NICD chuan hmun khata darh ang chi an hmuh chhuahah Pretoria-a zirna in sang pawh a tel thu a sawi bawk.
“Kan data neih hi a la beitham a, kan mi thiamten chhun zan zawmin hri chi thar hi vilin a tihtheihte an zir mek zel a ni,” an ti bawk.
World Health Organization (WHO) pawhin eng ang chiaha inkai darh chak theih nge tih sawihovin hmanhmawh takin thutkhawm an ko.
Geneva-a mi thiamte chuan variant ngaihven ngai tak niin an sawi.
WHO chuan an thutkhawm zawhah inkaihhruaina thar an puang dawn tih a sawi a; mahse, a inkai darh awlsam dan tak tak hre tur erawh chuan chawlhkar eng emaw zat zir a la ngaih thu an sawi a. Invenna neih tawhte hian a dang thei em tih pawh hre tur chuan hun a duh dawn tih an sawi bawk.
WHO an thutkhawm mek lai hian an pawl thupuangtu chuan sorkarte chu zin veivah khap leh turin an rawn mek bawk.
Hripui a len tan atang khan South Africa-ah hian mi maktaduai 2.95 chuangin an kai tawh a, mi 89,657-in an thihpui tawh bawk.
Ningani khan Britain chuan South Africa, Namibia, Lesotho, Eswatini, Zimbabwe leh Botswana atanga an rama zin luh chu zan lai atangin a titawp nghal tih a puang.
“Tuna hriat theih chinah he variant hi Delta variant aiin inkai a awl zawk a, kan vaccine pawhin a ngam lo zawka hriat a ni,” tiin UK Health Secretary Sajid Javid chuan a sawi.
Javid-a chuan he variant kai hi Britain-ah hmuh a la nih loh thu a sawi a, hetih rual hian British scientist-te chuan an bengkhawn hle tih a sawi bawk.
“Pathianni zing dar 4:00 leh a hnu lam atanga heng ram atanga lo thlengte chu khualbukah inkhung hrang tura tih an ni,” a ti a. “Hemi hmaa lo thlengte pawh an chenna inah uluk taka mahni lo invila ni hnihna leh ni riatnaah PCR test ti tura tih an ni,” a ti bawk.
“Heng ram atanga ni 10 liam ta chhunga lo thlengte chu PCR test ti turin kan ti bawk,” tiin Javid chuan a sawi.
South Africa hi tun hnai lawkah UK red list atanga paih a ni a; mahse, a tel leh nghal dawn tihna a ni.
Israel pawhin heng ram bakah Mozambique atanga an rama luh a khap nghal rih a. Africa chhim lam ram zawng atanga luh a theih loh tihna a ni.
Israeli-te pawh, heng ram atanga haw tharte chu khualbukah ni sarih atanga ni 14 chhung inkhung hrang turin sorkarin a ti.
Israeli health ministry chuan he hri thar kai hi an ramah Zirtawpni khan an hmu nghal a, ani hi Malawi atanga haw a ni.
Singapore, Japan, Italy leh Czech Republic pawhin South Africa nena intlawhpawh an khap ve nghal bawk a. Czech sorkar bik hi hri a len atanga an tawrh nat ber hun lai an tawn mek avangin an ram chhungah an inkhuahkhirh sa mek