CM-in hri leng vangin Rs. vbc 2,800 kan chân a tih hi thu belhchian dawl lo a ni : ZPM Thalai


Mizoram Chief Minister Zoramthanga’n nikum chhungin hri leng avanga Mizoram sum hmuh tur Rs. vbc. 2,800 chân anga a sawi hi thu belhchian dawl lo a ni tih Zoram People’s Movement party thalai chuan an sawi.
Nimina thuthar thehdarhtute an kawmnaah ZPM |halai hruaitute chuan Mizoram sorkar account report-a monthly key indicators (supplementary)-a a lan danin, Rs. vbc 2,800 dawng lo anga chief minister-in a sawi chu thu belhchian dawl lo hulhual a nihzia chiang takin a lang niin an sawi a. March, 2021 monthly key indicator atanga a lan danah phei chuan provisional-a Mizoram sum dawn tur (revenue reciept) hi Rs. vbc 1,000 laiin dawn belh hial a nih zawk tur an sawi.
ZPM |halai hruaitute chuan, “Nikum February thlaa budget session neih a nih hun lai khan hri leng avangin buaina leh harsatna engmah sawi a awm lo a, sum tamzia hlir kan ngaithla a ni. Engvanga tuna taka Rs. vbc 2,800 hmu lo angin insawi leh si nge an nih? Kan hmu lo tak zet a nih chuan khawi lai atanga kan hmuh loh? tihte chiang taka sawifiah turin kan phut a ni,” an ti.
Sorkar laipui atanga January thla atanga sum min pek anga chief minister-in a sawi pawh dawt chiang bal a nih thu sawiin, “A chhan chu, India sorkar hi hri leng avanga a inbuatsaih tanna kha March thla atang chauhin a ni. January-ah buaina a la awm lo,” tiin chief minister thusawi chu dawt chiang tak nia an ngaih thu a sawi.
MNF adviser leh minister ni bawk, C Lalrinsanga’n chief minister sum enkawl thiam avangin ramin sum dinhmunah harsatna lian tham tawk lo anga a sawi chu mipui hruai sual tumna niin, thu belhchian dawl loa an ngaih thu an sawi a. “Sum hmuh tur leh hmanna tur ngaihtuah lek lovin budget-a ruahman sa awm lovin sum hrawm lian tam tak hman pen a ni thin. Hengah hian supplymentary demand tam tak siam a ngaih phah thin a, chung erawh chuan kan pachhiatna leh retheihna te a belhchhah hle thung,” an ti.
Zirlaite scholarship chungchangah chhuanlam dawrawm tak tak hmangin tuna a dawngtu tur dik tak zirlaite hnena scholarship an pekte hi tawpsan lova pe chhuak tura an phut thu an sawi bawk.

Leave a Reply

Your email address will not be published. Required fields are marked *

error: Content is protected !!