NGAIHSAN TUR DIK

Vidpuia Hrahsel

Siamtu’n hringfate min duan dan zinga ropui leh danglam ka tih em em chu mizia leh hmel hi a ni. Mizia sawifiah tur hian thiamna ka nei lem lo, amaherawhchu siamtu hian mihringte hi chengho tura a din kan ni a, min duan dan hi a ropui em a, mize in ang lo theuh a min siamna te hi kan chenho naa rah tha chhuah tu, hmangaihna ti pung tu, in hriatthiam tawnna, inlungrualna leh chenho ti nuam tu a va ni em. Mihring te hian kan khawsakna leh kan chhehvela kan chenna a zir hian ngaihsan tur leh ngaihhlut tur kan nei hrang theuh thei awm e. Kan zavai hian kan ngaihdan, ngaihsan, ngaihhlut zawng a in ang thei vek lova amaherawhchu tupawh hian hmasawn tumin kan bei vek a. Hmasawn tum mi chuan ngaihsan tur dik leh ngaihhlut tur dik chu a chhia leh tha hriatna Pathian hnên atanga a dawn hmangin a ngaisangin a ngai hlu viau ngei ang.
Khawvel han thlir ila, ram leh hnam a zirin ngaihsan leh ngaihhlut tur dik ngaihsana ngaihhlut hi in ang lo tlâng hle awm e. Kan chawrchhuahna leh kan mihring puite nena kan chenhona kan chettlatna hmun a zir hian a in danglam hleih theih khawp ang le. Khawthlang han thlir ila, Mizoten kan en tam ber leh kan atchilh a ngaisang lem lo ten vun ngo ho inkhel mai mai an ti fo ‘English Premier League’ a khel thei tura Player te beih rim zia leh thawhrim zia te, an ngaihsan zawng tak te nena an inkhelh ho leh thin thu han hriat te hian keini helaia India ram hmarchhak tawpa awm te pawh hian kan lo hlimpui in, kan lo lawmpui ve em em mai zawng chu a nih hi. Mizoten Sap kan tih – British mi – England /London a cheng tam tak zing atang hian EPL a khel tur hian Academy a lut hi Nuai chuang fe an awm thin a. An zing atanga EPL khel pha chin chu mi 100 bawr chauh an ni tiin an sawi. Kan ngaihsan em em Inkhel thiam te khuan an naupan lai atanga an ngaihsan te bula inkhelh te, an Club tan em em tana khelh te hi an Dream vek a ni. Ni e, ram ropui leh changkang, hnam upa an ni tawh a. An ni nen chuan tehkhin teh rual kan ni lo, ka sawi duah chhan pawh hnam changkang an ni na kawngah hian an ni chuan an ram eizawnna, an ramin khawvel hriata an in phochhuahna kawngah hian an in chawimawi thiam in an in chhawmdawl thiam em zawng a ni.
Sapram atangin kan ramah lut daih teh ang. Kan ram Mizoram dinhmun thlir hian kan hmabak ah theuh hmasawn tumin pheilai kan khai mek a, thalai tam tak hi kan tui zawng leh ngaihsan /ngaihhlut a in ang thei vek lo. Amaherawhchu hmasawn tum mihring chuan zir thar tur a zawng zel a, zir belh tur leh hmasawnna rahbi kawnga pawimawh leh tanpuitu tur zawngin a kawng a zawh thin. Kan thiam dan ang angin hlawhtlin tumin kan bei theuh a, a then chu Zirna lamah, Zai lamah, Lam lamah, Designing lamah leh a dang dangah hmasawn tumin kan bei a. Mizo thalai tam tak hian tu hi nge ngaihsan tlak a, kan ram tana mi chhenfâkawm leh kan ram ti hmingtha tu, kan ram rohlu tak ni tur hi tun atanga kan thlir thiam a, kan ngaihsan hi a tul tawh hle mai.
Zirna chungchangah han lut ila, tu mai pawh hian kan hlawhtlinna kawng emaw kan hnathawhna kawng kan zawh hma hian zirna kan bei vek a. Mi tam zawkin an thlen theihloh thleng pha a, zirna sang zawk bei a hlawhtlinna chang te hi tun dinhmunah hian kan chawimawi tawk kan ti em? Kumpuan ah ‘Zirna Uar’ kan puang a, kan ram huap a zirna hrang hrang a ti tha te hi NGO hrang hrang te hian tun ai nasa zawk hian chawimawi tum ila, – Thuziak leh pawisa tlem a zawng inpek ringawt ai chuan an zirna kawnga an tangkai pui tur thil tam tak hi kan ngaihtuah pui a ngai ta. Entertainment a luang ral ringawt lo hian thalai lehkhathiam tak tak te tan hian sum ui lovin, kan chawimawi leh kan chhawmdawl hi a va hun tawh em. Midangte tana inzirna tur thil a nih phawt chuan an tan hian kawng engemaw tak zawngin sial sak a, an tana in phochhuahna, an thiamna chhawr tangkai, in sawipui tlin ringawt aiin a ngaihna hria saptawng takin – educated person te hi duhsak an va phu tak em! Zaithiam leh Lam thiam ringawt kan buaipui a, hengte ai chuan Zirlaite tana tangkai tur leh kan hnam hmasawnna tur thil dang a tak ram thleng thei tur te hi ngaihtuah a va hun tawh em! Ngaihsan tur leh Ngaihhlut tur dik kan ngaihsan theih nan, zirna kawnga hlawhtlingte hian hmasawnna rahbi an chan zel theih nan eng kawngah pawh duhsak tlâng teh ang u, an phu miau alawm. Hawh u, tun atang chuan zirna kawnga hlawhtling te hi chawimawi zelin, i ngai hlu thiam ang u.

Leave a Reply

Your email address will not be published. Required fields are marked *

error: Content is protected !!