Mizorama vawlh vulhte nasa taka suattu, African Swine Fever (ASF) leng chu a ziaawm hret hret a, vawk thi la awm zel mah se a tam tawh lo.
Vety department chhinchhiah danin nimin khan Mizoram pumah vawk pathum a thi a, Siaha district chhunga mi a ni a, district dangah vawk thi an awm lo.
Nimin thleng khan Mizoramah ASF vangin vawk 29,799 a thi tawh a, ASF kai rinhlelh vawk 10,380 suat a ni tawh a; ASF rinhlelh, vawk thi 533 an awm bawk.
Mizorama district awm zawng zawng 11 chu ASF hri leng hian a chenchilh a, ASF hri lenna khua leh venga puan hi 271 a ni.
Vawk pul hri leng vanga vawk thih tamna ber chu Aizawl district niin, vawk 12,287 a thi a. A len tanna, Lunglei district-in dawtin vawk 4,534 a thi a, Mamit district-ah 3,493, Serchhip district-ah 3,906, Saitual district-ah 1,909 leh Hnathial district-ah vawk 1,230 a thi tawh.
District dang paliah erawh vawk thiin sangkhat a pel lo thung a. District 11 zinga vawk thi tlemna ber, Kolasib district-ah vawk 133 a thi a, district dang – Siaha-ah 207, Lawngtlai-ah 652 leh Khawzawlah vawk 899 a thi a ni.
ASF leng avanga vawk chânten zangnadawmna an dawn theih nan Vety department-in hma la mah se tun thlengin department hian thu lawmawm dawn la nei lo nia thudawn a ni.