Mizoram-Assam ramri-ah kawng km 46.6-a thui sial zo thawkhat tawh


Vairengte huam chhunga Mizoram leh Assam ramri hrula hmasawnna kawng pawimawh zual km 46.5 a thui laih zawh thawkhat tawh a ni. Mizoram bawh chin ramri dep khaw lama hmasawnna chak zawka a kal theih an duh thu Vairengte Jt VC hruaituten an sawi.
The Zozam Times-in November 27, 2021 khan tun hnaia Assam nena ramria buaina a thlen hnua Mizoram sorkarin ramri depa hma a lakna hmun hrang hrangte a tlawh a. Tunah hian Vairengte chhehvel bikah ramri venna kawng pawimawh zual lai – CHC peng to Sihpui zau (km 4), Sihpuizau pengthuam to Sabual zau (km 2.5), High school tuichhuah tlang road (km 1), Horticulture farm to Tlangpui camp (km 5), Tlangpui peng to Darthanzauva huan tlang camp (km 1), Horticulture farm to Upper Aitlang Camp (km 4), Zarpuia phai to Phaisen road (km 2), Upper Aitlang camp to Phaisen road (km 3), IOC to Phaisen road (km 16), Auto stand to Mautui camp (km 2), Phainuam road to Mautui zau camp (km 4), a vaiin km 46.5 laih zawh thawkhat tawh a ni.
Heng kawngte bakah hian Saihapui V leh Phainuam lamah hian km 10 bawr vel ramri venna kawng laih niin, Saipum lamah km 32 laih a ni bawk.
“Hetianga ramri venna lama hmala tha sorkar hi kan la hre ngai lo a. Kan sorkar chungah kan lawm em em a. Heng kan kawng laihnate hi mi mal huan leh lo an ni deuh vek a, ram tana an ram leh thlai puitling tawh leh uiawm tak takte hlantu ram neitu chungah pawh kan lawm em em a ni,” tiin tunah chuan Mizoten an hmunphiah hmuh leh huanahte thlamuang takin hna an thawk thei tawh niin heng lai hmun tlawh kualpuitu, Vairengte Jt VC Chairman R Lalfamkima’n a sawi.
R Lalfamkima chuan kawng an laih theihna atana hma nasa taka latu bialtu MLA Lalrinsanga Ralte chungah te, hmasawnna kawng laih theih nana a hmuna hma latu Kolasib Bawrhsap Dr H Lalthlangliana leh SDO(C) Isaac C Lalrempuia te leh camp hrang hrang siamsaka mipuite vengtu tur sipai lam enkawltu, Kolasib SP Vanlalfaka Ralte te chungah lawmthu a sawi bawk.
Ramri hnaiha kawng laihte hi siam that ngai laite la awm mah se, lirthei eng chi tan pawha nuam taka zawh theih tura kawng hi siam a ni a. Kawng pawimawh laih zawh thawkhat a nih hnu hian ramri vengtu sipaite bakah helai kawng hnaiha huan lo ram neite pawhin an chhawr tangkai nghal hle nia sawiin, “Ramri-ah buaina a thlen hmain Aitlang phaia huan leh leilet te hi Mizote nen inrem siamin Balichori leh Bailaipur atangten hnam dangin an enkawl a. Mizote hian thlai thar phur zaa 30 vel chauh an chang thin a. Tunah chuan horticulture dept. hmalakpuina hnuaiah Mizo vekin huan an siam tawh a. Aitlang phaia nul siam chhungkaw 50 vel an awm mek a ni,” tiin, R Lalfamkima’n a ti.
November 23, 2021 khan ramri kawng pawimawh zual chu laih zawh thawkhat a nih thu leh, a siam that ngai lai leh tul dangte sorkar hriatpuinain bialtu MLA leh district bawrhsap te’n an siam leh tura an ngaih thu sawiin R Lalfamkima chuan, “Kan delh chin ram kan chingfel thawkhat tawh a, kan bawh chin ram nei nghet tur leh inremna tluantling nei a, ramri dep khaw lama development pawh chak zawka a kal theih hi kan duh tak zet a ni,” a ti bawk.
R Lalfamkima hian tun dinhmunah Assam lamin ramri hrulah kawng laih duh viau mah se, kawng laitu tur hi an inhmuh zawh thin loh avangin an duh leh beisei anga hma an lak theih loh thu a sawi a. “JCB hi ruai thin mah se, kawng lai tu tura an chhawr te hi an dawih em avangin hna an thawk rei ngam thin lo,” a ti.
Kawng laih thar te tlawh kual a nih bakah, ramri vengtute inkulhna hmun 10 zinga hmun paruk tlawh kual a ni bawk. Ramri vengtu Mizo sipai awmte zinga a tam zawk chu kumin June thla atanga ramri venga awm a, chawlh pawh la la miah lo te an ni. Hetih lai hian, an duty-na hmunah harsatna lian tham nei lo mah se hmunphiah keh hunah hian hmunphiah inchuhin buaina chhuak leh thei reng dinhmunah an din reng thu an sawi a ni.
Ramri hrula sorkarin hma an lakna te tlawh kualnaah hian Vairengte Joint VC te hi YMA leh khawtlang hruaitute’n an tawiawm a ni.

Leave a Reply

Your email address will not be published. Required fields are marked *

error: Content is protected !!