SUMDAWNG RINAWM + CUSTOMER RINAWM

  • Lallunghnema
    Charity Lodge He Zoram khawvel hi consumer te lalna ram a nih hma chuan kan bei zel dawn a. Engkim chan huamin kan thawk zel dawn a ni tih chhiartute ka chah duh che u a ni. Consumer Zorama din a nih theihna tura kawng hnai ber chu sumdawngtute leh customerte rinawmna hi a ni.Heng mi chi hnih a, a pakhat zawk rinawm ringawt hi a tawk zo lo va, anni pahnih hi an rinawm ve ve tur a ni. Chu chu hlawhtlinna bul a ni.
    Ka article chhuak hnuhnung berah khan consumer mi pahnihte hlawhtlinna ka rawn ziak a. Kha mite pahnih chunga thil thleng kha thil thleng ngai lo a ni lova, tun hma lamah pawh kan lo buaipui fo tawh thin a ni . Heng Thil thlengte hi vanduai thil a nih theih laiin rinawm lohna raha a ni fo bawk. Mahse khang mi pahnihte thil tawn kha rinawm loh vang ni lovin thil thleng palh a ni thei ang chu. Kha nula khan a chhungte hnenah thil chi hrang hrang a thawn a.Vanduai thlak takin kawng lakah tihchingpen a ni a; a thil thawn bungruate chu a thleng kim lova, A bo then a ni. Tih luih ni lovin tih palh thil a ni thei. Kha parcel kha Dak hotuten a tihchibgpen a ni tih ziakin an nemghet bawk . Khawi atanga bo ta mai nge tih erawh a hriat theih loh. A phurtute custody-a mi a nih miau avangin mawh an phur a ni mai. Kal kawng laka rualrem lo taka dah emaw hun emaw a ni thei. Parcel a lo chhiat khan a chhunga mi te chu a bo lo thei lo thin à ni. Khatiang aa an bungraw phurh bo ta chu an mawhphurhna a ngaiin item bo hu tawk pawisa an chawi ta mai a ni. Tin, Cooler hralh chhuaktute pawh khan an thil hralh cooler chu a lo chhiat avangin warranty period a la ni bawk a. A thlawnin Cooler chu an lo siam that sak ta a ni tih kan sawi a nih kha.That leh thata inlawm hi a man hla ber.Sual leh sual inbat hi chu ,’na,’ tak a ni!
    Khang seller leh service provider te khan luhlul lo chhuah ta se, Consumer Commission-ah lo khing ta se, thiam loh change mai tur an ni A. Mahse heng service provider leh seller te hi an rinawm avangin buaina A awm lova, lawm takin an customer te an thlah fel thei a ni. An entawntlak hle. Consumer-te leh sumdawngte chet velnaah hian Consumer Protection Act hi a lar ber lo thei lova. Eng ang pawhin Sumdawnghoteten dan siam ve mahse, consumer tr venhimna tura Dan awm sa hi A lal ber tur a ni ringawt mai. Dawrkai thenkhatin “Bungrua lei tawh, kir leh theih loh” A saptawngin “Goods once sold cannot be returned” tihte hi seller te duhthusam mai mai a ni. Consumer Protection Act chuan bungraw chhia hralh a khap a. Bungraw chhia, hman theih loh lei an awm chuan a tharin emaw a chhe lai siamtir turin emaw dawrkaite chu an pan thiang a. Dan a ni bawk. A thlawnin an lo siam thatsak tur a ni zi ri thawh mai a ni.Dawrkai leh service provider hlawhtling chuan a hma chauh a sial tur a ni lo,consumerte hmakhua a ngai ve bawk tur a ni. Dawrtute(buyer) ngai chang thiam apiang an hlawhtling thin a ni. Chutiangin bungraw phurtute(transporter/courier)hian an bungraw phurh chu him takin a lo dawngtute hnenah an thlen ngei tur n ni. Tunlai hian mi tam takin on-line hmangin bungrua an chah thin a. On-line a thil chah hi a tlawm bik thin tih a ni. Hetih lai hian bungraw chahtu (consumer, customer) tam tak chuan harsatna an tawk thin a ni. An bungraw chah chu an chah ang a ni lo, an duh aiin a lian, an duh aiin a te, A rawng(colour) a dik lo, A chhing lutuk, A te lutuk, A lian lutuk, A fual lutuk, A pan lutuk, A chhah lutuk ti vel mai maiin an phun liam ringawt thin. A nihna dik takah chuan, bungraw chah chu a chahtu duhdan a ni tur a ni. Cash memo emaw receipt emaw kawl that tur a ni bawk. Harsatna a awm chuan complaint nghal tur a ni.Thil phurtute hnenah thlen thuai tur a ni. Mahse, report vat tur a ni tih hi mi tam zawk chuan an peih lo, an huaisen tawk lo, an thisenin a ngam lo. Hei hi thil pawi tak a ni. On-line service hian home delivery a keng tel tih hriat tur a ni. “In awmna A hla emaw an awmna a thlang em mai!in awmna kawng a chhe em mai! ” tih chhuanlam a home delivery tih duh loh hi sumdawng rinawm lo tak zia a ni. Hetiang mi rinawmna hloh thak khawpa duham hi an hlawhtling mawh khawp mai.
    Dawrkai thenkhat chuan printed price phuah chawp an ching hle. Printed price ti chhiain marker hmangin A man an ziak chawp thin. Hei hi rinawm lo raha chhia va a ni. A Kristian lo hle. Sumdawng thenkhat chuan hlep tam tak nei chungin “Hlep ka nei lo” an ti ngam. Dawt sawi an awlsam thin hle.Thlai leh chawhmeh zuartute pawhin hlawk duh luat vangin anmahni dawrtute hnenah hlep nei lo ang a in sawiin dawt puar pawleng an uar hle. Lal Isua hnung zuitute tih atan a mawi lo a ni. Buk tling lo, bungraw chhiate hi rinawm lo zia a ni a. Consumerte tuarna a nih bakah mipui tuarna a ni tel bawk. Anmahni dawrkai ho ngei pawh hi a tuartu an ni tih ka sawi duh a ni. Chuvangin mi tin kan fimkhur a tul a ni.
    Rinawmna hi hmasawnna leh hlawhtlinna bul a ni a. Tih tur chhawp chhuah dan tha ber a ni. Sumdawngho rinawm tura kan beisei lai hian customerte pawh an rinawm ve tur a ni. Cash memo lak leh vawn that te. Bungrua tha taka enkawlte, ba a thil lak rulh thatte hi a pawimawh em em a ni. Customer chuan dawrkai lakah hawihhawm a chhuah tur a ni a. Mawl a rem lo.Smart Consumer nih an tum theuh tur a ni.Tawngkam mawi tak hmang ve ve tur an ni. Tute mah hi an in chapo khum tur a ni lo. Dawrkai an awm loh chuan mipui nun a buai thin. Dawrkai an awm hian lei tur a awm a, mipui tan a man hla em em thin a ni. Leitu an awm loh chuan dawrkai chuan chaw a nghei ang!
    Sap pachal Benjamin Franklin-a chuan heti hian a sawi a, “The Best Policy is Honesty” tiin. Hemi awmzia hi ‘Thil tih tura hmachhawp tha ber chu rinawmna hi a ni,’ a tihna a ni awm e. Chuvangin eng dinhmunah pawh ding ila, eng pawh ti dawn ila, a pawimawh hmasa ber chu rinawmna hi a ni. Rinawmna hi hlawhtlinna bul a ni a. Sumdawng hlawhtling, consumer hlawhtling ni tur chuan rinawmna hi a pawimawh ber a ni. Ram chhung economy siam tha tur leh mipui himna leh hlimna thlentu chu rinawmna hi a ni. Chuvangin he consumer khawvelah pawh hian rinawmna hi ka thlah phal tur a ni lo. Dawrkai rinawm chu dawr a nuam thin a. Consumer rinawm chuan a rinawmna rah chu a seng ngei thin bawk a ni. Buaina leh intihchhiatna thlen fo na chhan pawh hi rinawmna kan tlak chham vang a ni fo. Rinawm lohna chuan eirukna a thlen a, mipui tuarna a lo awm thin bawk. Thil man sang thut thut te, bungraw chhia hralhte hi sumdawngho rinawm loh vang a ni. Rinawmna hi engkim a hlawhtlinna bul a ni e.
    Sumdawngte u, RINAWM rawh u,
    Dawrkaite u, RINAWM rawh u.
    Consumerte u, RINAWM rawh u,
    Customerte u, RINAWM rawh u.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427