Bengal-a lirthei insu-ah mi 18 thi


West Bengal-a Nadia district-ah Pathianni zing dar 2:00 vela lirthei pahnih insu-ah mi 18 an thi a, mi parukin hliam an tuar bawk.
Lirthei insu hi bungraw phur chi lirthei, pitar kum 80 chuang ruang leh a vuitu tur phurtu leh anmahni tawk zawka tlan truck niin Hanskhali-ah an insu tih police chuan an sawi.
Ruang leh a zuitute hi Bagdah, North 24 Parganas district-a chengte niin Nadia-a Nabadwip-a ruang halna hmun pana kalte an ni.
“Chhiatna thleng hi hmutu an awm lo va. Anmahni tawk zawnga tlan truck nen an insu a, mi 18 an thi a. Pitar ruang hal tura kal an ni a, police chuan kan chhui zui mek,” tiin Kalyani Superintendent of Police Sayak Das chuan a sawi.
Truck hi lung phur a ni.
Mihring phurtu zawk lirthei khalhtu hi a hah deuh bakah truck lo tlan hi chhum tam avangin a hmu mai lo nia a ngaih thu police officer pakhat chuan a sawi.
“Driver thachhangdawltu hi kan bia a, a khalhtu hi a muthlu a nih theih thu a sawi,” tiin mak tak maia dam chhuak zinga mi, Bidhan Chandra Das chuan a sawi.
“Thi zinga mi panga hi pitar chhungte hi an ni a, a dangte hi chu an laina leh an thenawmte an ni,” a ti bawk.
Hliam tuarte hi a bul hnai damdawi inah dah an ni hlawm.
Union Home Minister Amit Shah, Chief Minister Mamata Banerjee leh Governor Jagdeep Dhankhar te chuan thi chhungte an tawrhpui thu an sawi.
Chief minister chuan hliam tuarte dam thuai tura duhsakna hlanin, thi chhungte pawh state sorkarin puih theihna a neihah a puih dawn thu a sawi bawk.

Leave a Reply

Your email address will not be published. Required fields are marked *

error: Content is protected !!