Ramri dep khaw lama development ngaihtuah
November 27, 2021 khan Aizawl chanchinbu mi te chuan tun hnaia Mizoram sorkarin Vairengte chhehvel ramri venna tana pawimawh tak kawng eng emaw zat a laih thar te an tlawh a. He’ng kawng laih thar te hi a thui zawng belhkhawm hi km 46.5 lai a ni.
Assam leh Mizoram in ramri buaina tun hnaia an neih hma khan ramri veng tura Mizo sipai te hi hnim pik tak tak hmunphiah kung kara inhai veng chawpa duty post siam an ni. Mahse, tuna sorkarin kawng a laih hnu hian awlsam takin a inkalpawh zung zung thei tawh a. Lirthei eng chi tan pawha zawh theiha kawng sial thar a ni ta hi ramri vengtu sipai tan pawh hmanrua leh chakkhai lam a tihsamkhai tawh bakah, khaw tual mi huan leh lo siam kawngah pawh awlsamna nasa tak a siam sak a, a lawmawm hle.
Ramri hrula kawng pawimawh tak laih zawh thawkhat a nih hnu hian ramri vengtu Mizo sipaite mai bakah, helai kawng hnaia huan lo ram neite pawhin an chhawr tangkai nghal hle nia sawi a ni te leh, ramri-a buaina a thlen hmaa hnam dangin huan leh leilet te siam a a hlawkna tam zawk an tel thin pawh tunah chuan Mizote’n enkawl tawhin, a hlawkna an tel let zawk ta tih thute hriat a nihin hmasawnna ropui tak pakhat a tih theih awm e.
“Chumi chin chu kan ram luah chin a ni…” tia lehkha pawimawh neih tam leh that bakah tawngka hmanga ramri hauh ringawta duhtawk ngah mai lo va, a taka ram bawh tura hak kan zauh hret hret zel pawh a tul a. Chumi tihlawhtling thei tura ngaihtuah kan seng reng tur pawh a ni.
He’ng kawng laih tharah hian duhtawk mai lova, ramri dep khaw lama development chak zawka kalpui a nih theih dan tur hi ngaihtuah ran a pawimawh dawn hle a. Chumi atan Mizoram sorkar pawh a inbuatsaih turah ngaiin, beisei bawk ila.