A nupui tan Taj Mahal ang in sa!


Indian sumdawng kum 52 mi chuan kum 27 chhung zet a lo neih tawh a nupui tan Taj Mahal ang chiaha in a saksak.
Anand Prakash Chouksey hian a nupui tana in hi Madhya Pradesh-a Burhanpur khawpuiah a dinsak a ni.
“Ka nupui tana ka thilpek a ni a, hetih rual hian kan khua leh a mi chengte tan pawh a nei,” tiin Chouksey hian BBC a hrilh.
In sak nan hian Rs. maktaduai 20 a hmang tih a sawi bawk.
Taj Mahal hi kum zabi 17-na hun laia Agra khawpuia thlan in (mausoleum) sak a ni a. Mughal emperor Shah Jahan-a’n a nupui, Mumtaz-i tan, a fa 14-na a hrinsaka raicheha a thi ta puala a sak a ni.
Marble hmanga sak in hi a chei mawina zawng zawng nen a hluin India-ah chuan khualzin hiptu ber pakhat a ni a. Hripui a len hma khan ni tin mi 70,000-in tlawh ziah ang a ni a, heng zingah hian khawvel huap mi lar leh hmingthang tak tak pawh an tel.
Chouksey-a’n a nupui tana a ang chiaha a sak hi ram acre 50-a zauvah a ni a. damdawi in pawh a tel a. Tlawhtu pawh an tam nghal hle a ni.
A kawt phulah mi an leng a, thla an la nasa hle tih a sawi a. “Mi tam takin inneih thlalakna atan an rawn hmang,” a ti.
“Tumah ka lo hnar duh lo va, kan khuaah chuan tute pawh kan inhria a, ka in pawh an tan ka hawng vek a ni,” a ti.
Chouksey-a hian an in chhung lut duh zawng zawng erawh a phal bik loh thu a sawi a, “Kan in a ni a, kan chenna a ni tlat a ni,” a ti.
A chang erawh chuan an inchei dan, a chhung an tih dan, pangpar an hun dan leh marble bang leh chhiat an tih dan leh tukverh kual an siam dante en duh hrim hrim chu an luhtir thin.
In chhungah hian mut pindan pahnih a awm a, hei hi chhawng hranah a ni a. Lehkhabu chhiarna in leh meditation room a awm bawk a. Drawing room-ah marble ban a awm a, in chung chhohna ker mawi leh ceiling chei par a awm bawk.
Chouksey-a hian Islam deuh taka an tih loh thu a sawi a. A sak nan hian kum thum an hmang a, an entawn ber, Taj Mahal en hian Agra-ah pawh an kal zing a, uluk leh chik takin an en tih a sawi.
A len zawng pawh Taj Mahal tak tak aia a let thuma te turin an duang a ni.
Chouksey-a hma hian Uttar Pradesh-a pa pakhat chuan a nupui tan Taj Mahal ang chiah a lo sa tawh bawk.

Leave a Reply

error: Content is protected !!