NITI Aayog-in report a tihchhuahah Meghalaya chu India hmarchhaka state rethei ber niin Assam-in a dawt.
Meghalaya hi India ram pum puiah pawh retheih lamah pangana dinhmun a hauh va, Assam hi a dawt chiahah a awm bawk tih NITI Aayog report-ah tar lan a ni.
India ram pum pui dinhmunah Nagaland chu rethei 10-na a ni a, Arunachal Pradesh-in dawt chiahin Manipur chu 14-na a ni a, Tripura chu 16-na niin Mizoram chu 22-na a ni a, dinhmun tha ber a hauh.
Ei leh in tur tha kham neih chungchangah hmarchhak state dangte hi Meghalaya lakah chuan an dinhmun a tha hle a. Assam hi a dinhmun a tha tehchiam lo bawk.
Meghalaya-ah hian a mi cheng zingah ei leh in tur mihringin a mamawh ang chi ei phak lo 10% lai an awm anga chhut a ni a. India ram pumah erawh 37.05% a ni thung.
India ram pumah Bihar chu state rethei ber niin Jharkhand (2-na), Uttar Pradesh (3-na) leh Madhya Pradesh (4-na) ten an dawt.
Meghalaya-ah mitthi an neih zinga 3.10% chu naupang leh thalai an ni a, India ram pumah hetiang rual thi dinhmun sanna ber a ni bawk.
India rama rethei dinhmun tehna, Multidimensional Poverty Index (MPI) measure an tih hi ki lian pui pui pathum – hriselna, zirna leh khawsak phung a awm a. Hemi hnuaiah hian tehna tenau chi hrang hrang 12 a awm leh.
Hengte hi ei leh in hmuh that, naupang leh thanglaite thihna thlen tam dan, nau piang hlimte enkawl dan, naupangten sikul an kai tan kum, sikul an kai that leh that loh, ei siamna tur thuk neih dan, faina leh thianghlimna, tui thianghlim in tur, electric, chenna in, in chhung bungrua leh bank account neih dante pawh a tel.