Mizoram Volleyball Association chuan Zirtawpni khan General Body Meeting an nei a. Tun season a volleyball in hma a lak dan tur an rel.
Hotel Chhungte International-ah he hun hi hman a ni a. District Association hruaitute hnenah hmasawnna turin pawis hlan an ni.
VFI Vice President leh MVA Sr. Vice President Dr. Lalmalsawma Nghaka chuan he hunah hian thu a sawi a. “Covid 19 in min tibuai chunga hmalakna hrang hrang a awm hi a lawmawm.” a ti a.
Kum 5 chhunga International Player pakhat tal nei tura kan inbuatsaihna a la kal mek thu a sawi a. Mizo Volleyball khel thin thalaite tun aia hmasawn tura inbuatsaih zel turin a sawm bawk.
MVA General Secretary C. Lalrokhuma chuan report kimchang a pe a. Mizoram sorkarin District thar 3 a hawnah hian Mizoram Sports Discipline zingah Mizoram Volleyball Association hi District Sports Association hawng kim hmasa ber a nih thu a sawi.
Rorelna hun hman a nih bakah chawhlui an kilho nghal bawk.
General Body Meeting thurel tlangpui:-
- MVA General Body Meeting chuan Inter District Volleyball Championship 2022 chu Hnahthial District Volleyball Association thlen tùrin a rêl.
- District Volleyball Association registered player te hi an register-na District Tournament-ah chauh inkhelh phal ni tawh rawh se.
- MVA Constitution Article 23 na, District Volleyball Association enkawlna kalphung dan thar duan chu pharh a niin, a thu ṭhenkhat siam rem hret a, pawm a ni.
- MVA hruaitu thlan a felfai zawk nan MVA Constitution Article 14.3 in floor Nomination siam a phal tih bo ni rawh se, tih chu pawm a ni bawk.
- Khawzawl DVA atanga Agenda lut, Inter District Volleyball Championship thlengtute hi MVA atang hian pawisa fai pek ve ni tawh rawh se, tih chu kalphung pangngai a nih angin, a zat ti danglam lovin, a ngai anga tih chhunzawm zel ni rawh se, tih a ni bawk.
- GB Meeting hian District Volleyball Association inkaihhruai dan thar an siam bawk a ni.