Bairabi khawtlangin Bairabi khaw mi, in hmun la neilote tana in hmun ruahmanna kalmekah chhungkaw 87 tan in hmun an ruahman fel tawh.
Bairabi khawtlang hruaitute chuan an khawtlanga in hmun la neilo te tana in hmun ruahmansak chungchang hi nimin khan bialtu MLA, minister of state K Lalrinliana hovin Panchayat Bhavan, Bairabi North-ah an sawiho a. Bairabi Joint VC chairman R Lalfakawma’n a sawi danin, Bairabi North-ah chhungkaw 55 tan inhmun an ruahman fel tawh a, chhungkaw 7 dangte in hmun tur an ruahman leh mek a. Bairabi South-ah chhungkaw 32 tan in hmun ruahman fel tawhin, chhungkaw 50 vel tan ruahmanna an kalpui leh mek bawk.
Kolasib bialtu, minister of state K Lalrinliana chuan managing board hmalaknaa din Bairabi higher secondary school leh Presbyterian English school, Bairabi te tlawh nghalin, zirnaa hmasawn duha Bairabi HSS managing board hmalakna ropui a tih thu leh an inpekna leh zirtirtu leh khawtlanga mi inphalte inpekna avanga result tha tak an neih thin avanga lawmawm a tih thu a sawi a. Zirlaite pawh kawmin, ram tana chhawrtlak thiamna awmze nei thlang thiam turin a fuih.
Bairabi Higher secondary school hnenah hian bialtu MLA chuan football, volleyball leh volleyball net a pe a. School inrelbawlna atan MLA fund atangin Rs. nuai 2 a pe tawh a. Presbyterian English school, Bairabi pawh tlawhin, Rs. 10,000 a pe a, school thawmthatna tur cement bag 100 a pe. Govt. High school, Bairabi pawh tlawh nghalin, football, volleyball leh volleyball net a pe a. MLA fund hmanga Bairabi multipurpose mini-sports complex-a Basketball leh Volley court siam mek a endik nghal bawk.
Pic courtesy : Bairabi facebook page