Pachhunga University college-a Mizo department-in ni hnih awh, video conference hmanga Mizo tawng zirhona, ‘Mizo tawng : dinhmun leh hmathlir’ an buatsaih chu Thawhtanni zan khan MYC chairman Dr Vanlaltanpuia’n a hawng.
MYC chairman chuan Mizo tawng humhalha tihmasawn zel tura theihtawp chhuah a tul thu a sawi a. “Mizote central service leh civil service lama kan tlin tam theihna atante, Mizo tawng humhalh zel a nih theihna atante India danpui chhunga Eighth schedule-a Mizo tawng dah ve dan kawng zawn pawh a tul” a ti.
Thusawitu hrang hrang ten Mizo tawng humhalhna atan Mizo tawng chu India danpui hnuaia sengluh a tul thu an sawi a. Mizo tawng siamthat leh herrem a tul thu sawiin, sorkarin Mizo tawng a hman uar deuh deuh a tul thu an sawi rualin, tawng dang thiam thei tura tanlaka, tawng pahnih aia tam hmang thei (multilingualism)-a luh a tul thu te an sawi.
Mizo tawng chu a hmangtu an tam tawk loh avangin humhalh a ngaih tih thusawitute chuan an sawi a. Tawng boral hlauhawm (endangered language) nia an sawi thin chu, tunah chuan mithiam ten tawng thang mek (thriving/rising language) a nih thu an sawi tawh tih sawiin, la humhalh zel erawh a tul thu an sawi bawk.
Mizo tawng zirhonaah hian tunlaia Mizo zinga tawng lama mithiam pathum – Dr. Rema Chhakchhuak, Ph.D (linguistics), Beifang Ethnic University, Ninxia, PR China, tuna New Delhi-a awm mek; Dr. Marina Ngursangzeli Behera, Research tutor, Mphil stage leader, Oxford center for mission studies, Oxford, UK, Associate researcher, Pretoria university, South Africa, Editor of Peer reviewed academic journal ‘Transformation’ leh Dr. Laltleipuii, Ph.D (Linguistics), ICFAI University ten Mizo tawng dinhmunte, a hmathlir te leh a pawimawhna te an sawi a ni.