Mizo nulaten Madhya Pradesh lakah goal li an khung a. Kawng engkimah an khingpuite thununin 4-0 in hnehna an chang a, Senior Women’s National Football Championship-ah quarter-final atan an tling.
A thlengtu Kerala 3-2 a hneh tawh Mizoram hian Kozhikode a EMS Corporation Stadium-ah an khingpuite hi an thunun tluan a. Goal hmaah an vanneih ni nise goal tam zawk khung a chak thei an ni.
Group G-ah Mizoram hian khelh hnih atangin point ruk an hmu tawh a. Kerala leh Madhya Pradesh ten point thum ve ve an hmu tawh a, Mizoram la hmabak Uttarakhand in point an la hmu lova, head-to-head record en tel a nih avangin Mizoram dinhmun a chiang tawh.
Mizo nulate an par vul
Mizoram hian K. Lalhruaizeli goal vengah an ring a, a hmaah Ruthi Lalrinmawii, K. Ngopaw Di, Lallungmuani leh Lalchhanhimi te tlarhnungah an ding.
An hmaah Lalthansangi’n tlarhnung leh midfield inzawmna hmun pawimawh a luah a. Tlarhma a maltlat Miriam Lalnunsiami chu Lalduhthlani Pachuau, Lalbiakdiki, Grace Lalrampari Hauhnar leh Elizabeth Vanlalmawii ten an thlawp.
Madhya Pradesh hi an match hmasa zawka goal li khung an ni a, Mizoram in goal khung hma a pawimawh tih hria in bul an tan a, an tum ang ngeiin minute 11-naah Miriam Lalnunsiami’n goal a khung.
Inkhel thununtu zawk nimahsela Mizoram in an chance neih an khung belh hleithei lova, goal ban leh a crossbar an tihper.
Halftime zawhah an insiksawi a, Zairemmawii Chawngthu dah luh niin danglamna a siam a. Minute 49-naah goal a khung bakah penalty a hlawhchhuak a. Elizabeth Vanlalmawii leh Grace Lalrampari ten goal dang an khung.
Mizoram coach Lalrozara chuan, “Nidanga kan inkhel nise goal riat vel chu kan khung thei mai ang, mahse goal li kha a tha tawk viau. Kan kheltha , kan thunun em em a, a hmawrbawkah kan tum ang a ni deuh tih mai a ni.” tiin The Zozam Times zawhna a chhang a.
“Inbuatsaihna kan nei tha a, kan inbuatsaihna angin kan khel fo. Goal nawr chiam ni lova inkhel thunun tel tum kan ni a, a hmalam chu a nghawng ve deuh lo thei lo. Kan nau te an tangrual a, an thawkrim a, chu chu khelmualah pawh a lang.” a ti.