CS atan Mizo tawng thiam dah tura ngenna PM-in bawhzui a tum


Aizawl: Mizoram sorkarin Mizo tawng thiam ngei chief secretary a neih theih nana sorkar laipui a ngenna chu Prime Minister Narendra Modi-a’n bawhzui a tum thu Chief Minister Zoramthanga hrilh.
Nimin khan Zoramthanga’n Prime Minister Modi-a chu Parliament Building-a a pisaah a kawm a, Mizoramah Mizo tawng thiam ngei chief secretary dah an nih theih nana an ngen tawh chungchang a sawi chhuak a, Modi-a hian a ngaih pawimawh thu leh a tula bawhzui a nih tur thu a lo sawi a ni.
Chief Minister Zorama chuan Mizoram State-in All India Services cadre hrang a neih ve theihna tura chak taka hma lakpui turin prime minister hi a ngen a, Mizoramin separate cadre a neih ve theihna tura a khawihtu ber, union secretary hnenah lehkha ziaka tihhlawhtlin thuai a nih ngei theih nan file pawh chak taka kaltir nghal tura hriattir turin a ngen.
Sorkar thuchhuah tar lan danin Mizoramin All India Services cadre hran a neih theih nana hma lak hi prime minister leh union home minister hrang hrangten an lo tiam tawh thin a ni.
Mizoram sorkar hmalakna pawimawh tak, mau chungchang pawh Zorama chuan Modi-a hnenah hian a sawi chhuak a, mau chinna hmun leh a sawngbawlna hmun (industry)-te chu a thlalak nen chipchiar takin a sawipui.
Zorama chuan bamboo link road sial a tulzia sawi chhuakin, hei hi Modi-a chuan a ngaih pawimawh thute, a hlawhtlin ngei theih nan finance minister hnenah sum leh pai sanction-na turin head of account siam tura a hriattir tur thu Zorama hi a hrilh a ni.
Myanmar tual chhung buaina tlansana Mizoram raltlan an tam thu Zorama hian sawiin raltlante tanpui turin prime minister a ngen a, heng bakah hian MNF returnee-te tan housing assistance a dilpui bawk.
Nimin vek khan chief minister hian Union Finance Minister Nirmala Sitharaman chu a pisaah a kawm bawk a, HUDCO loan-a leiba, ZIDCO leh a hmaa housing atana state-in a lo batte chu sorkar laipuiin a theih anga rulhsak turin a ngen.
15th Finance Commission-in Special Grant-a pek tura an recommend tawh Mizoram tana vaibelchhe 500 chuang, union finance ministry-in hman a remtih loh chinte chu remtihsak hram turin Zorama hian Sitharaman hi a ngen bawk.

Leave a Reply

Your email address will not be published. Required fields are marked *

error: Content is protected !!