Nitinin kan fimkhur zual sauh sauh a tul
Hri leng kan tawrhtirh lam khan theih ang tawkin kan fimkhur a, sorkar pawh a che tha thawkhat hle. A thawhhnihnain min han nuai a, kan lo inthlahdul mah mah deuh ta niin a lang a, lockdown siam rei record thlengin kan han siam chho kha a ni a, kan dinhmun kha a duhawm hauh loh.
Tunah kan dinhmun tha deuhin kan ngai a ni mai thei a, fimkhurna erawh kan vawn a, mitin kan la inthlahdah loh a tul hle. Sorkar pawhin ruahmanna tha leh felfai siam reng se la, hunpuiin min hmuak a, kan darh leh hak ang tih hlauhawm tak a ni.
Covid-19 hrik thar Omicron an tih chu khawvelin a buaipui leh hle tawh mai a, India ram pawh a theih ang anga lo inbuatsaihin, State leh UT zawng zawngte chu a tul anga lo inbuatsaih turin a hriattir hlawm a, kan state ngei pawhin a thawh hnihna kan tawrh nasatzia kan hria, a chi thar a ni emaw, a thawh thumna atan hrim hrim a, kan lo inbuatsaih nasat lawk ve hi a tul khawp mai.
An sawi dan phei chuan tuna hrik thar hmuhchhuah hian vaccine la tawhte pawh a ngam viau a niawm a, vaccine lak tawhin awmzia a neih leh neih loh thlengin hriat harsa an la ti hle. Mithiam zawkte pawh an rilru a la buai a, mipui lam pawh fimkhur kan ngai hle a ni.
Tuna hrik thar hi a rawn darh huk ang tih a hlauhawm hle a, a darh loh nan leh hri leng laka kan la him zel nan hrim hrim pawh fimkhur kan la ngai a, inthlahdah thei kan la ni lo tih kan hriatreng a tul hle. Sorkar pawhin theihtawp chhuah zel se la, mipui lamah inzirtirna nasa zawk la pe reng mawlh teh se. Kan him tlanna hi a pawimawh ber a ni tih kan hriatreng a tul hle.