Nov. thla chhungin Lungleiah RT-PCR bun hman lo


Sorkarin Lunglei Zotlang Tourist Lodge-a RT-PCR khawl bun tura a rawih, M/s Mizoram Business Centre-in November thla chhungin khawl an bun hman lo va, Lunglei chhunga NGO hrang hrangten November thla ral hmaa hman theih tura an ngiatna chu a hlawhtling dawn ta lo a ni.
Lungleia RT-PCR Laboratory bun tura ruahmanna kal mek chungchang sawihona, nimina Sub Hqrs YMA Conference Hall-a neihah NHM Mission Director Dr Eric Zomawia chuan RT-PCR khawl bun tura an rawih, khawl dealer M/s Mizoram Business Centre, Tuikual North chu Novmeber 26 ral hmaa khawl bun tura ngen an nih thu sawiin, an mi rawihte hian an ngenna hi an tihlawhtling thei lo tih a sawi.
Dr Eric Zomawia chuan RT-PCR khawl bun tura an rawihte chu khawl bun vat a nih theih nana service engineer-te Mizorama chah lut vat tura an nawr thu sawiin, RT-PCR khawl bun chungchangah hian an mi rawihten harsatna an nei zel a nih chuan a tul chuan ZMC-a Microbiologist-te pawh rawn kal an inhuam em em tih a sawi.
Lungleia RT-PCR Laboratory dinna tur atan hian ‘India COVID-19 Emergency Response & Health System Preparedness Package: Phase-II (ECRP-II package)’ kaltlangin bungrua leh thil hrang hrang leina atan Rs nuai 30 dawn a nih tawh thu sawiin, “Government e Marketplace (GeM) Portal hmangin online bidding kaltlanga buaipui mek niin hmanraw thenkhat a lo thleng tawh a, rawn thlen kim thuai theih nan hmalak a ni,” a ti.
Lungleia RT PCR Laboratory-a thawk turin Civil Hospital Lunglei-a thawk mek Officer leh Staff mi parukte chu Viral Research & Diagnostic Laboratory (VRDL) Zoram Medical College, Falkawn, Aizawl-a, training-tir an nih tawh thu Dr Eric Zomawia chuan a sawi a, RT PCR khawl bun vat tur hian theihtawp chhuaha hmalak a nih thu a sawi bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427