Mizoram football team chuan Thawhlehni khan Hero Santosh Trophy North East Zone Qualifier a an match hnihna an khel a. Inkhel boruak sangah tlem zawk ni chungin Nagaland 1-0 in an hneh.
Imphal a Khuman Lampak Stadium a inkhelah Mizoram hian first half-ah red card an hmu a. Heti chung hian Lalnuntluanga Bawitlung chuan goal awmchhun a khung a. Hnehna pawimawh changin Santosh Trophy final round atan tling turin point khat hmuh belh bak an mamawh tawh lo.
Boruak a sang
Pathianni a Tripura 1-0 a hneh tawh Mizoram in Nagaland hma a ding turin 4-3-3 in an team an rem a. Goal veng F. Lalmuanawma hmaah F. Malsawmzuala, Lalmuanawma, Lalrinchhana Tochhawng leh Lalremruata te an ding.
Midfield-ah Lalengzama Vangchhia, Lalnuntluanga Bawitlung leh K. Lalrinfela te an rem a. Tlarhmaah Lalhriatpuia chu a HK Lalhruaitluanga leh Lalbiakhlua ten an thlawp.
Inkhel tan hnu lawkah Nagaland in Mizoram penalty area chhungah ball an vawrhlut a. Muanawma’n a nem chhuak tur leh Nagaland forward an insu a. Referee in penalty a pek chu assistant referee in penalty a ni lo a ti a, thutlukna an sut avangin Nagaland an thinrim a, an buai zui avangin inkhel a khaihlak.
Inkhel tan leh hnuah thil thleng avangin referee thlak a ni hial a. Lalhriatpuia chu yellow card vawi hnih inkar hla lo tak a pek a ni a, minute 25 vel atangin Mizoram an tlem zawk.
Mahse Mizo tlangvalten minute 44-naah goal an khung a, Engzama cross Lalnuntluanga’n goal-ah a khung a. Mizoram in hma an hruai hnuah dinkhawng an tum a. Second half-ah erawh goal khung belhna huntha an nei nual.
Inkhel zawhah Mizoram manager K. Lalenghluna chuan, “Team lehlam an lungawi loh avangin boruak a sang a, referee in boruak a zo lo. Lalhriatpuia card hmuhna hmasa zawkah thutlukna pawh thui takin a nghawng. Referee inthlak ngai hi thil thleng zen zen lo a ni a, a mak duh angreng hle zawk.”
“Kan tlem avangin inkhel a hautak a, hnehna kan sual chhuak. Player inzat a inkhel ni ila chu fitness leh theihnaah kan san zawk avangin beisei nei sang zawk kan ni.” tiin The Zozam Times a hrilh a.
An hmabak thlirin, “Manipur hi team tha an ni a, kuminah Final rounds khelh an tum ruh hle. An chak chuan an la tlin theih avangin keini pawh kan inthlahdah dawn lo. Kan naute an thawkrim a, an nungchang leh discipline pawh pawn lam mite fak an ni a, a lawmawm hle.” a ti bawk.