Messi-a’n a vawi sarih nan Ballon d’Or dawng

Paris St-Germain leh Argentina forward Lionel Messi chuan record ni turin a vawi sarihna atan footballer tha chawimawina Ballon d’Or a dawng.

Kum 34 mi Messi hian kum 2021 chhungin goal 40 a khung a, Barcelona tan 28 khungin Paris Saint-Germain tan goal li a khung a, ram tan vawi 8 khung tawhin Copa America a chawipui a. A vawikhatna atan an ram team trophy lian a lakpui.

Bayern Munich leh Poland striker Robert Lewandowski chu pahnihna a ni a. Kum 2020 leh 2021 chhunga match 98 atanga goal 111 khungtu striker hi mi tam takin phu zawkah an ngai.

Ballon d’Or hi khawvela infiamna lama chanchinbumi thlan bik mi 180 ten an thlan a ni a, France Football magazine in a buatsaih niin ani in thlan theihte an chhawpchhuak a. A thlangtu tur chanchinbumiten point pe in an thlang.

FIFA chuan kum 2010 atang 2015 chhung khan France Football nen thawkdunin FIFA Ballon d’Or tiin he chawimawina hi sem a ni a. Khawvela player tha ber tehnan a hman a ni fo. Kum 2016 atangin FIFA a kal hrang a, The Best Football Awards chu amahin a ‘official’ takin a kalpui ve thung.

Kum 2020 khan he chawimawina hi Covid 19 avangin sem a ni lova, hemi tuma che tha fal, club trophy chawi theih chawi kim deuh vektu Lewandowski chu mi tam takin dawng turin an ngai.

Messi bawk
Ballon d’Or hi kum 2008 atanga 2019 chhung khan Messi leh a elpui hlun Cristiano Ronaldo ten kum 2018 a Croatia midfielder Luka Modric-a’n a lak kum tih lovah an inchhawk ngat ngat a, kuminah Ronaldo hi top 5-ah lang pha lovin Messi-a’n a vawi sarih nan a la.

Paris a Theatre du Chatelet-ah, “Helaiah ka ding leh thei hi thil ropui tak a ni. Kum hnih kalta kha ka tan a tawpna a nih ka lo ring a, mi tam takin ka chawlh hun tur kha min zawt tawh a, mahse tunah Paris-ah ka inkhel a, ka hlim hle.” tiin a sawi.

Lewandowski chu fakin Messi chuan, “Robert nena kan inel thei hi ka tan chawimawina a ni a, kan zavai hian kum 2020 chawimawina kha ani aia dawn phu hi an awm lo tih kan pawm vek” a ti bawk a.

“Kumin hi ka chetthat ber kum a ni em chu ka sawi thei lo, chetthat tak tak tawh kum ka nei hnem tawh. Mahse Argentina nen kan hlawhtling a, selna leh hun harsa tam tak karah kha khan a tidanglam bik a ni.” tiin a sawi tel.

Chawimawina dangah duan thar pahnih Striker of the Year-ah Lewandowski chu thlan a ni a. Chelsea in Best Club chawimawina an dawng.

Hmeichhe chawimawina Barcelona leh Spain midfielder fing Alexia Putellas chuan a dawng a. An ram league leh UEFA Champions League a an chungnungnaah a lungphum pawimawh a ni.

Kum 21 hnuailam chawimawinaah Barcelona midfielder tho Pedri chu thlan a ni bawk a. Chawimawina lian dawngtute zingah Barca kaihhnawih pathum an lang.

Leave a Reply

Your email address will not be published. Required fields are marked *

error: Content is protected !!