Mizo boxer-ten Fight Night pay-per-view atang an chanvo an pe kir

LPS Fight Night 2 en tum a Chhimbal Application hmangte zingah harsatna tawka en thei lo an awm a, hei vang hian Mizo boxer pasarihten pay-per-view atanga chanvo an neih tur lak an tum lo.

November 27 khan Dawrpui Multipurpose Centre-ah LPS LPS Fight Night 2 buatsaih a ni a. NT Lalbiakkima’n round hnihnaah technical knockout-in Gerrtipong Kumsahwat a hneh a, awlsam takin IBA intercontinental title a humhim.

Rs 100-in Chhimbal PPV unit khat hralh a ni a, unit 2,258 hralh chhuah atangin Rs 2,25,840 hmuh a ni a. Ruahman lawk angin Mizo boxer pasarihin Rs 1,90,932 (85%) an chang thei dawn.

Mahse khawl lam harsatna avangin en thei an awm mang lo va, sawiselna pawh a nasa hle. Mizo boxer-te chuan mipuiin an en theih miau loh avangin an chanvo tur lak loh tha an ti a, mipuiin an thlawp zel theih nan sum sengtute hnena pe kir leh vek turin thutlukna an siam.

Chhimbal atanga sum lut 15% (Rs 34,908) chu application neitute chan tur a ni a, anni hian PPV leitu, inhnek en thei si lote hnenah an sum sen pek kir leh vek an tum bawk.

LPS in PPV unit 38,000 hralh
LPS Fight Night organising committee chuan Thawhlehni khanLPS pay-per-view unit 38,000 an hralh tih an puang a, Chhimbal atanga leitute nen a vaiin PPV unit 40,000 chuang an hralh chhuak.

March 6 khan R Dengthuama Indoor Stadium, Mualpui, Aizawlah a vawi khat nan Mizoram in professional boxing a thleng a, LPS Fight Night hmasa ber hi LPS PPV hmanga pek chhuah tawh niin unit 50,000 tling lo deuh an hralh chhuak a.

Fight Night hmasa aiin Mizo boxer pasarih inlannaah LPS PPV unit 10,000 chuangin an hralh tlem zawk a, Rs 3,51,816 an hloh tih an puang.

LPS PPV unit khat Rs 60 niin a vaiin Rs 22,80,000 a lut a, sponsorship atangin Rs 4,00,000 an hui bawk a, a vaiin organising committee kutah Rs 26,80,000 a lut.

Hetih lai hian LPS Fight Night 2-ah Rs 30,34,298 an seng ral tih an tar lang a. Biakkima leh Thai boxer Kumsahwat-an dollar 2,000 (Rs 1,50,000) ve ve hlawhin boxer 14 inlante hlawh atan Rs 6,00,000 an sem chhuak.

Chhimbal Application PPV

Hralh chhuah zat : Unit 2,258
Sum hmuh zawng zawng : Rs 2,25,840 (Unit khat Rs 60)
Mizo boxer pasarih chanvo (85%) : Rs 1,90,932
Chhimbal chanvo (15%) : Rs 34,908

LPS Fight Night 2 sum hmuh leh chhuak :

Sum Hmuhna :

  • LPS PPV (unit khat Rs 60) : Rs 22,80,000 (unit 38,000)
  • Sponsor : Rs 4,00,000

Total : Rs 26,80,000

Sum Hmanna :

  • IBA & PBC sanction fee, boxrec fee, belt, supervisor & official salary, travel, viso & transport etc : Rs 9,78,988
  • Boxers 14 salary : Rs 6,00,000
    (NT Lalbiakkima leh Gerrtipong Kumsahwat – dollar 2,000 (Rs 1,50,00) ve ve; inhnek dangah a chak Rs 30,000, a tlawm zawk Rs 20,000)
  • Ground & ring management, decoration, light & sound, refreshment, staff salary, etc : Rs 11,19,310
  • Hotel Regency lodging, bunker hiring, etc : Rs 3,33,518

Total : Rs 30,31,816

Leave a Reply

Your email address will not be published. Required fields are marked *

error: Content is protected !!