Nimin khan Zoramthanga’n Prime Minister Modi-a chu Parliament Building-a a pisaah a kawm a, Mizo tawng thiam ngei Chief Secretary Mizoramah dah an nih theih nana ngenna an lo tawh chungchang a sawi chhuak a, Modi-a hian a ngaihpawimawh thu leh a tula bawhzui a nih tur thu a lo sawi a ni.
Chief Minister Zorama chuan Mizoram State-in All India Services cadre hrang a neih ve theihna tura chak taka hma lakpui turin Prime Minister hi a ngen a, Separate Cadre Mizoramin a neih ve theihna tura a khawihtu ber Union Secretary hnenah lehkha ziaka, tihhlawhtlin thuai a nih ngei theih nan file pawh chak taka kal tir nghal tura hriattir turin a ngen.
Sorkar thuchhuah tarlan danin, Mizoram State-in All India Services cadre hran a neih ngei theih nana hma lak hi Prime Minister leh Union Home Minister hrang hrang ten an lo tiam tawh thin a ni.
Mizoram Sawrkar hmalakna pawimawh tak mau chungchang pawh Zorama chuan Modi-a hnenah hian a sawi chhuak a, mau chinna hmun te leh a sawngbawlna hmun (industry) te chu a thlalak nen chipchiar takin a sawipui.
Zorama chuan Bamboo link road kawng sial a tulzia sawi chhuakin, hei hi Modi-a chuan a ngaihpawimawh thute, a hlawhtlin ngei theih nan Finance Minister hnenah sum leh pai sanction-na turin Head of account siam tura a hriattir tur Zorama hi a hrilh a ni.
Myanmar tualchhung buaina tlansana Mizoram raltlan an tam thute Zorama hian sawiin, raltlante tanpui turin Prime Minister hi a ngen a, heng bakah hian MNF returnees te tan Housing Assistance a dilpui bawk.
Nimin vek khan Chief Minister hian Union Finance Minister Nirmala Sitharaman chu a pisaah a kawm bawk a, HUDCO loan a leiba, ZIDCO leh a hmaa housing atana State-in a lo bat te chu sorkar laipuiin a theih anga rulh sak turin a ngen.
15th Finance Commission-in Special Grant-a pek tura an recommend tawh Mizoram tana vaibelchhe 500 chuang, Union Finance Ministry in hman a remtih loh chin te chu remtihsak hram turin Zorama hian Nirmala Sitharaman hi a ngen bawk.