Omicron: WHO-in khawvel pumah inkai darh nasa tak a thleng thei a ti


World Health Organization (WHO) chuan Omicron coronavirus variant avangin khawvel puma hri leng chu kai an tam lehzual thei niin a sawi.
He variant hi khawvel ram thenkhatah chuan nasa taka inkai darhna a thleng thei niin WHO hian Thawhtanni khan a sawi.
An pawl hotupa, Dr Tedros Adhanom Ghebreyesus chuan ram tinte chu ram rethei zawkten invenna an lak chak theihna tura che chhuak turin a sawm nawn leh.
Covid-19 chu khawvelah a la awm reng a, ‘duhtawk a la ngah lo’ niin a sawi.
Variant thar hi tun thla tir lama South Africa-a hmuh chhuah niin tuna hriat theih chinah chuan a hmaa he hri lo kai tawhte tan pawh kai leh a awlsam dwn nia hriat a ni a. South Africa ram chu he variant a hmuh chhuah leh a puan thuai avangin fak a hlawh.
“Omicron hi a hmaa lo leng tawh hri atanga nasa taka insiam danglam a ni a, hripui leng mekah hian chhiatna lian zawk a thlen thei dawn a ni,” tiin WHO chuan a sawi.
Thawhtanni khan Dr Tedros chuan khawvel hmun hrang hranga scientist-te chuan variant thar hi inkai a awlsam em, kai nawn leh theih mai a ni em tih leh vaccine hmanten an dang thei em tih te zirin an hmanhlel hle tih a sawi.
“Mi tam takin Covid-19 hi kan kal pel tawh nia kan inngaihna atangin Omicron hian chet vat a ngaihzia min rawn hrilh nawn a, he hri hian a tih tur a la hlen lo a ni,” a ti.
Hri chi thar avang hian khawvel khawiah mah thi an awm hriat a la ni lo tih a sawi bawk.
A kai erawh ram hrang hrangin an ramah an awm tih an puan belh zel a. Heng zingah hian Canada, UK, Portugal, Belgium leh Netherlands te pawh an tel.
Variant thar avang hian UK, European Union (EU) leh United States chuan Africa khawmualpui ram thenkhat atanga an rama zin luh a khap nghal a, hei hi South Africa President Cyril Ramaphosa chuan a sawisel nasa hle nghe nghe.
Japan pawhin an ramri chu ram dang mi lut turte tan Thawhlehni zanlai atangin a khar tan a. Australia pawhin rei tak an lo khar tawh, an ramri hawn a tum mek chu a hun a sawn hla leh rih.
Australia-a lehkha zir leh hna thawka lut turte visa, Nilaini atanga hman tan theih tura tih tawh chu December 15 atanga nung tura sawn hlat leh a ni.
Israel pawhin he hri thar avang hian an rama ram dang mi luh a khap thar leh tawh bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427