December 1, nimin kha khawvel pum huapa AIDS dona ni, World AIDS Day a ni a. He ni puala kawngzawh neih hman puitu, Health Minister Dr R Lalthangliana’n AIDS vei thar awm tawh lohna ram ni turin tanrual a ngai ta hle tih a sawi.
Mizoram State AIDS Control Society (MSACS) bultuma World AIDS Day Rally neihah health minister chuan Mizorama he natna kai tharte chu a tlangpuiin kum 19–49 inkar an nih ber thu sawiin, a kai awm renga ngaih thin ruihhlo bawiha tang te, mipat hmeichhiat kawnga buan chak lote chang ni lovin mipui nawlpuiah a thleng tawh tih a sawi.
Dr R Lalthangliana chuan Mizorama chengten HIV hrik paite an hmangaihin, an lainat a, an tan an tawngtai thin bakah a taka che chhuak thin an tam thu a sawi a, “MSACS hian amah maiin a bei thei lo va, NGO kan thawhpuite leh kohhran, khawtlangte nena kan tanho thinna hi a hlu tak zet a ni,” a ti.
World AIDS Day pual inkhawmah hian AIDS Healthcare Foundation (AHF) hmalakna kaltlangin Aizawl khawpuia taxi driver leh two-wheeler taxi driver-ten AIDS dona kawnga an hman tangkai tur hmanrua (two-wheeler taxi driver-te tan jacket leh four-wheeler taxi driver-te tan seat cover) sem a ni bawk.