Bangladesh-ah hmar-chhak hel la awm nual


Border Security Force (BSF) chuan India hmarchhaka hel pawl hrang hranga mite chu thenawm ram, Bangladesh-ah awm an la awm teuh niin a sawi.
Hmarchhak hel, Bangladesh-a la tawm mekte hi an awm hmun atanga chea beihna thlen erawh an ni lo tih ramri vengtu sipaite chuan an sawi bawk.
BSF hian hel pawl hrang hrangte hian Bangladesh-ah hian camp pawh an nei chuang lo va; mahse, a awm chu an awm a, an khawsa ngei tih an sawi.
BSF Meghalaya Frontier chuan helho hi an chhungte in velah emaw, anmahni lainattuten khawsakna tur an lo pekah an cheng mai hlawm niin a sawi.
“Thudawnna atang chuan India hel pawl hrang hrangte hi Bangladesh-a Chittagong Hill Tracts vel leh Meghalaya nena inrina lai velah hian an la teihawi nasa hle a ni,” tiin BSF Meghalaya Frontier Principal Staff Officer D Haokip chuan a sawi niin news agency PTI chuan a tar lang.
Haokip chuan, “An awmna hmun atang hian chet erawh an rawn che tawh lem lo,” a ti bawk.
Bangladesh-a hmarchhak hel pawl mi la khawsate hi National Liberation Front of Tripura (NLFT), Hynniewtrep National Liberation Council (HNLC) leh Dhristi Rajkhowa-a kaihhruai ULFA hel pawla la bângte kha niin a sawi.
Haokip chuan, “Camp pawh an nei chuang lo va. An chhungte leh anmahni lo lainattuten kiangah leh hmun an pekah an khawsa mai a ni,” a ti.
Tun hnai khan Shillong, Meghalaya-ah India-Bangladesh ramri vengtute hi an thukhawm a. Bangladesh-a India hel pawl mi la khawsate laka chet lak dan turte an sawiho.
He thutkhawmah hian BSF chuan Border Guards Bangladesh hnenah an rama India hel pawlte tawmna thin te, an zat te, an dinhmun leh an chungchang pawimawh hrang hrangte chu an hlan nghal a ni.

Leave a Reply

Your email address will not be published. Required fields are marked *

error: Content is protected !!