Lunglei a RT-PCR khawl bun a harsa em em reng mai hi!?
Lunglei leh chhimlam tana RT-PCR khawl bunna turah a hlawhtlinna hmel a la hmuh theih loh a, tlawmngai pawl hrang hrangin nawrin, huntiam pe tawh mah se, vawiin thlengin tihhlawhtlin a la ni lo thung.
Lunglei chhunga NGO hrang hrangten November thla ral hmaa hman theih tura an ngiatna chu a hlawhtling ta lo a, engtin zel nge hma an lak dawn hriat a la ni lo bawk a ni. Sorkar hian chhuanlam chu a nei leh tawh ngei mai a, mah se an chhuanlamte hian a chhan rawn insawifiah ve ta se, sorkar bawk hi kawh rawn an ni lovang tih a sawi theih loh a, RT-PCR khawhar taka dah reng mai hi a kawnghmang tawh lo hle bawk a ni.
NHM Mission Director Dr Eric Zomawia chuan RT-PCR khawl bun tura an rawih, khawl dealer M/s Mizoram Business Centre, Tuikual North chu November 26 ral hmaa khawl bun tura ngen an nih thu sawiin, an mi rawihte hian an ngenna hi an tihlawhtling thei lo tih a sawi a, RT-PCR khawl bun tura an rawihte chu khawl bun vat a nih theih nana service engineer-te Mizorama chah lut vat tura an nawr thu sawiin, RT-PCR khawl bun chungchangah hian an mi rawihten harsatna an nei zel a nih chuan a tul chuan ZMC-a Microbiologist-te pawh rawn kal an inhuam em em tih a sawi.
Harsatna a awm a nih chuan sorkar hian mipui nawrna avang pawhin hma a la thuai thuai tur a nih laia chhuanlam siam zawnga a la khawsa zel a nih chuan rintawk an hlawh lo zel ang tih a hlauhawm a, khawl bun tura an rawihte pawh a tul angin bepawp reng se la, Lungleia RT-PCR khawl awmsa bun hlawhtlin vat hi a hun tawh hle a ni.