Sikulah inkahna: Zirlaiin a zirlaipui pathum kap hlum


United States-a Michigan state-ah, high school zirlai naupang kum 15 mi lek chuan an sikulah a zirlaipui mi pathum kap hlumin mi pariat a hliam bawk a, hliam tuar zingah hian an zirtirtu pawh a tel.
Zirlaiin a kah hlumte hi Tate Myre, 16, Madisyn Baldwin, 17, leh Hana St Juliana, 14, te an ni a. Tum sa renga kap hlum a ni em tih erawh hriat mai theih a nih loh thu thuneitute chuan an sawi.
Police-te chuan a kaptu nia an puh ber, zirlai ve tho hian Zirtawpnia a pain a lei thar, handgun hmangin a thiante hi a kap niin an sawi.
Zirlaite chuan silai a hmeh puah lai hian hlauvin dawhkan hnuaiah an biruk hlawm thu an sawi.
Zirlai thenkhat chu an himna tur ngaihtuahin an inah an tawm hlawm bawk.
Police chuan Detroit khawpui atanga km 65 vela hla, Oxford khuaa high school-a thil thleng chungchangah hian kohna chu Thawhlehni chhun dar 12:51 (India-a zan dar 11:21)-ah an dawng.
A hnu minute reilo te chhungin emergency services chuan phone-a kohna vawi 100 chuang an dawng zui nghal a ni.
Thuneitute chuan police koh an nih atanga minute nga hnuah, an sikul corridor-a officer-ten an hual chep hnuah rawlthar hi a inpe tih an sawi.
Man a nih lai hian silai hmeh puah a awm tawh lo va, amah pawh a inhliam lo va, semi-automatic handgun kengin a mu pasarih a lo la awm.
Thil thlen dan kimchang hriat theih la ni chiah lo mah se police chuan ralthuam hi sikulah a backpack-in a ak lut ang a, bathroom-ah la chhuakin a che zui ta a nih an ring.
Zirlai thi zinga pahnih, hmeichhia – Madisyn Baldwin leh Hana St Juliana hi a hmunah an thi a. Tate Myre-a erawh deputy car chhungah, officer-in damdawi in a thlenpui hmain a thi thung.
Tate-a hi Michigan-a American footballer lar chho tura beisei ber zinga mi a ni a. An sikul khelmual pawh ama hmingchawia hming thlak turin online petition kalpui nghal niin mi 32,000 chuangin an thlawp thu an ziah hnan tawh.
Hliam tuar zinga mi pahnih chu zai an ni a, paruk erawh an dinhmun a tha a. Zirtirtu pawh a darhah hliam tuar mah se damdawi in a chhuahsan thei lehnghal.
US-ah hian zirna ina inkahna hi tun hnaiah a thleng tam hret hret zel tih silai thunun thlawp pawl, Everytown chuan a sawi.
Nikumah khan coronavirus avanga inkharkhip avangin a tlahniam hret a; mahse, kuminah hian vawi 138 zet sikul leh a chhehvela inkahna a thleng leh tawh niin an sawi.

Leave a Reply

Your email address will not be published. Required fields are marked *

error: Content is protected !!