Mizo students’ union (MSU) executive committee nimina thukhawmin “Health care scheme 2021–2022 atana budget-a sum dah a ni lo chunga sum senga mipuite in-register-tir an ni hi mipui zahlohna lian takah kan ngai” an ti.
MSU chuan Health care scheme chungchangah April 2021 hnu lama bill pek la ni lo leh bill Rs. nuai 3965 la tang chu hriatthiam har an tih thu an sawi a. Health care scheme 2021–2022 atana budget-a sum dah a ni lo chunga sum senga mipuite in-register-tir chungchang nena sawifiah turin Mizoram sorkar an phut.
MSU executive committee thukhawm chuan Myanmar ram buai avanga Mizoram beltute tan Krismas hunpui chawlh laia Mizo tawng zirna hun buatsaih an rawt a. Myanmar atanga Mizorama raltlan te chu tawng hrang hrang hmang an nih avangin anmahni pawh inbe hleitheilo te an awm thu leh Mizoram hmun hrang hranga lo mikhualtute nen pawh harsatna an tawh thu an sawi a. Hemi chungchangah School education minister leh director dawra hmalakho an rawt bawk.