Gospel Music Festival ropui leh hmuhnawm, thlarau nun chawm tur ni bawk si GRACE 2021 chu zirtawp zan dar 8-ah Vaivakawn cultural centre & auditorium-ah buatsaih a ni dawn.
Hripui leng avangin a hmunah mipui tan chhim remchang dawn lo mahse, LPS 1 leh Zonet Zawlbuk bakah Zonet youtube channel-ah te live-a pekchhuah a ni ang.
Grace 2021-ah hian Gospel artist tha nia kan hriat te chu an kim hle dawn a, Upa C. Ngurthantluanga’n thuchhah tawi a sawi dawn bawk. Mizorama concert neih tawha mipui tamna bera la chhal KTP Gen. conference-a jubilee concert leh Thazual award pawh hneh taka lo kaihruai tawhtu Zonuni’n live show a kaihruai dawn a, Gospel band thar Altar Call-in live show hi an hawng ang.
MZI Rimawi award 2021-a Artist of the decade dawngtu Vanlalsailova, Thazual award gospel singer of the year dawngtu Maruati te bakah Israela Pachuau, Fiona, Mawitei, Henry, Nunui, Andrew, Arini, Cindy, BOG, Stacy, Zorema, Jonathan Lianhna, Jerry, Benjamin Colney, Hlimhlimi, Gospel band Bee 31 leh Swordtune te an inlan dawn.
Rimawi kaihhnawi company lar tak Roland leh tualchhung mi dang ten an sponsor tur Grace 2021 ah hian Mizoram live concert-a kan la hmuh ngai loh Roland Grand Piano chhawp a ni dawn a, he Grand piano hmang hian Stacy-‘n ‘Khawngaihna mak mawi leh duhawm’ a sa dawn, hei ngawt pawh hi he concert en ti manhla tu a ni ngei ang.