Mizoram hmeichhe football team chuan Nilaini khan Uttarakhand nen Hero Senior Women’s National Football Championship a an group match hnuhnung ber an khel a. Goal inpe lovin an inhnehtawk.
Kerala a khelh mek inelnaah hian Mizoram hi chhiarkawp dana tling chiang tawh chungin inkhel bul an tan a. An khingpuite hi Group G-ah a mawngphah an ni ve thung.
Mizoram in an team line up siksawiin Lallawmchhungi’n goal a veng a, tlarhnungah Esther Lalnunzawmpuii, Lallungmuani, Ruthi Lalrinmawii leh Malsawmkimi an ding a. Midfield-ah Lalchhanhimi, Lalhmingmawii, Zairemmawii Chawngthu leh Lalbiakdiki te an intlar.
Tlarhmaah Miriam Lalnunsiami leh Vanlalhmangaihzuali te an ding.
Uttarakhand hi goal sarih chhuah tawh an ni a, chak nei miah lo an nih avangin goal chhuah belh loh thupuiah an hmang a. An striker pahnihte bakin khelmual chhungah Mizoram lam an thleng phei meuh lova, goal ven chu thupuiah an nei tawp a. Mizoram in inkhel thunun mahse player pariat in engtiklai pawha goal an ven avangin hmunawl an nei tam thei lo.
Mizoram manager K. Lalhlimpuii chuan, “Point an la hmuh loh bakah goal an chhuah hnem tawh avangin mualpho nawn an duh lo a ni ber a, an lamah an inhnawh tlat a, tun tum inkhel chu a hlimawm lehling zawk. Kan naute hovin ball an chan pawhin an inhnawhkhawm tlat avangin goal lamah an luhpui hlei thei lo.” tiin The Zozam Times a hrilh.
Vawiinah hian group stage a match hnuhnung ber khelh a ni hlawm dawn a. Quarter-final a Mizoram hmachhawn tur hriat a ni chauh ang.