HMEICHHE HUANG
I pawimawhna i hria em aw?
Pawimawhna nei tlemte hi chuan hlutna pawh an nei tlem nge nge ț in. Tin, hlutna nei tlem nia ka hriatte kan ngaih pawimawh dan pawh a nep viau thin. I kawppui laka i hlutna leh pawimawhna i hriat loh chuan i hmabak chu a eng viau lo mai thei a ni. Engvangin nge Nupa an lo ințhen ț in le? Mawlmang deuhvin a sawi theih. An mawhphurhna leh pawimawhna an tih loh avangin an inkarah khi a lo awm a, chu chuan nupa chu a ti țhen ta țhin.
Hmangaihtu leh lainatu nei nia kan inhriatna hmun, hlu leh pawimawh ve nia kan inhriatna hmun chu kan ngainain kan thlahlel țhin a ni ti r’u? Hetiang hmulo leh changlo nia kan inhriatna hmun chu ngainat leh thlakhlelh a hnekin kalbosan thuai thuai kan chak zawk țhin a ni. A chhan chu Hmangaihtu mamawh kan nih avang leh hlutna neih duh mihring kan nih vang a ni. Tin, zalenlo ni a kan inhriatna hmun pawh nuam kan ti thei lo. I kawppui kha nangmah ang bawka zalenna thlahlel leh mamawhtu a ni. Mahse, zalenna hi thil hlu tak a nih rualin zalenna hmang thiamlo leh hmang diklote chu hmun zalen lo ah dah an ni fo țhin. Sal ni a inhriat tlatna hian nun a ti nuam ngai lo! Inrahbehna leh inpalzamnate hi hmangaihna ze kentelte zinga mi a nih loh avangin i kawppui i rahbeh leh i palzam lutuk chuan zawi zawiin a hlat tan ang che.
I kawppui tana nun ti famkimtu i ni tih inhrilhnawn fo vang che. Nangmah maia i awm khan Nupa i ni thei lo. In pahniha in awmdun khan Nupa chu in ni. Nupa inzawmna vawnghim tur chuan Nupaa insiam te mawhphurhna a ni. Ințhen duhlo eng ang mah la, i kawpuiin a then tlat si che chuan…. nupa ni thin chu nupa in ni thei tawh lo dawn tihna a lo ni!
Rilțam chuan a nun chhanhim nan eitur a zawn a ngai țhin. Tin, Tuihal pawhin a tuihal tih reh nan in tur awmna a pan a ngai ve țhin. I kawppui pawh kha a lo rilțamin a lo tuihal viau thei a nia aw. Nangamaha a mamawh leh duhte hmulo leh changlo nia a inhriat rual chiah khan kalsan tur chein a insiam tan thei a nia.
I kawppui tițha leh tichhe theitu pawh i ni. Mi țha tak pawh hi mi sual taka ngaih luih tlat chuan min runluih nan hrim hrim a sual thiam viau thei. Tin, mi fel vak lo pawh i enkawl țhat phawt chuan mi fel takah i chhuah thei tho bawk. Mi enkawltu azir leh kan bula awmte azira danglam thiam leh thei țhin mihring kan ni.
Tin, taksa thiamhlimna kawnga invawn ulukna hian ngawi rengin kawppui te chak takin a hip thei. Nu or Pa nih tawh avang maia thianghlimna kawnga inthlahdah hi a atthlah viau. Nulat or tlangvallai nen chuan tehkhin theih ni tawh lo mah se, i kawpui tana thianghlim taka i invawn khan i hriselna atan pawh a țha tel a ni. Khaini rim nam rum rum chung te, zakkha rim nam huam te, zu țhing rim nam te, thaw uih lutuk te, meizial rim nam rum rum chunga kawppui te bula inthawlh ngawt chin te hian lehlam mi a hawisan chaktir thei.
“Mama Pa khan min lo țhen lo sela chuan Nuthlawi ka ni lo tur hi a nia aw!!! Aw hun, kohkir a, han siamțhat leh theih ka va chak tak em! Mama Pa, hawh, bul i țan țha leh teh ang”, tiin amahin thil sawt thei tawh lo turah insawh insawh mah se, thil anih tur anga a ni zawh tawh avangin a theih tawh loh tluk a ni. “Bawihi Nu, min ngaidam rawh…. hawh bul i țan țha leh ang,: ti mah se, a nupuiin a rinngam tawh miau loh avangin a aw chu boruakah a thamral thlawn mai mai ta a ni.
I hmalam huna i awmdan tur i hre lawk vek thei bik em? Tuna lo “THLAWI” ta te dinhmun angah hian i la ding ve thei tho a sin? “Ka thlawi dawn” tih hi lo hre lawk ta se, an țhen tak te kha an lo nei duh or ngam thovin i ring em? Kan hmalam hun kan hre lawk vek thei si lo.
Eng pawh ni se, i kawppui laka i mawhphurhna leh i hlutna hria la, chu chuan i kawppui laka i awmdan turah țha takin a puih thei ang che. Famkimlo mihring ve tho i nih si avangin i kawppui mithmuha mi famkim anga i lan theih nan a siamtu che Lalpa bel țlat zel ang che. Ani chuan i mamawh dan ang zelin i tana tha turin ro a rel sak chein kawngdik a kawhhmuh zel ang che.
Tin, i kawppui i phatsan chiah khan i siamtu Lalpa pawi i sawi a ni tih hria ang che. I kawppui tana i thinlung i serhhran ang zelin i taksa pawhin i thunlung chu a zui zel ang.
I kawppui tan Lunghlu tha-mi ang i ni e.